Մամուլի ազատության հարցերով ԵԱՀԿ ներկայացուցիչ Հարլեմ Դեզիրը ողջունել է ՀՀ կառավարության արագ արձագանքը՝ մարտի 23-ից սահմանված արտակարգ դրության հետ կապված իր մտահոգությունների վերաբերյալ:
«Ողջունում եմ ՀՀ կառավարության տրամադրած բացատրական հուշագիրը, որը ստացել եմ ի պատասխան մարտի 24-ի մամուլի հաղորդագրության: Մասնավորապես, ցանկանում եմ նշել, որ ՀՀ կառավարությունը որոշել է փոփոխություն մտցնել լրատվամիջոցների գործունեության կանոններին վերաբերող որոշման մեջ՝ լուծելու համար այն հարցերը, որոնք մտահոգում էին ինձ, լրատվամիջոցների պաշտպանության ոլորտում ներգրավված հասարակական կազմակերպություններին և Հայաստանում խմբագիրներին ինչպես նաեւ` ի պատասխան խոսքի ազատության վերաբերյալ միջազգային կազմակերպությունների դիրքորոշմանը, որն արտացոլված է մարտի 19-ի համատեղ հայտարարության մեջ»,-ասվում է Դեզիրի հայտարարության մեջ, որը հրապարակված է ԵԱՀԿ կայքում:
Նա ընդգծել է, որ ՀՀ կառավարության որոշմամբ՝ կարգավորվելու է միայն բժշկական եւ համաճարակաբանական բնույթի տեղեկատվության հրապարակումը: «Կիսում եմ ՀՀ կառավարության մտավախությունը ճգնաժամին վերաբերող կեղծ տեղեկատվության տարածման դեմ պայքարում, միևնույն ժամանակ հիշեցնում եմ տեղեկատվության ազատ հոսքի ապահովման կարևորությունը»,-ասվում է հայտարարության մեջ:
Հարլեմ Դեզիրը նաև նշել է, որ ԵԱՀԿ-ն շարունակելու է համագործակցել ՀՀ իշխանությունների հետ արտակարգ դրության ժամանակ և դրանից հետո՝ մշակելով կեղծ նորությունների և ապատեղեկատվության դեմ պայքարող ռազմավարություն:
Ավելի վաղ հաղորդել էինք, այն մասին, որ մամուլի ազատության հարցերով ԵԱՀԿ ներկայացուցիչ Հարլեմ Դեզիրն իր անհանգստությունն է հայտնել մարտի 23-ին Հայաստանում Քրեական եւ Վարչական իրավախախտումների վերաբերյալ օրենսգրքերում փոփոխությունների փաթեթի վերաբերյալ, որի նպատակն է պայքարել կորոնավիրուսի համաճարակի վերաբերյալ ապատեղեկատվության դեմ:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
