ԱԺ պետաիրավական հարցերի հանձնաժողովի նիստում այսօր ՀՀ կառավարության ծրագրի 2019թ.-ի կատարման ընթացքի զեկուցման ժամանակ «Լուսավոր Հայաստանի» պատգամավոր Տարոն Սիմոնյանը զեկուցող, ՀՀ արդարադատության նախարար Ռուստամ Բադասյանից հետաքրքրվեց. «2019թ.-ին որոշ համայնքներում հանցավորության աճ եւ հանցագործությունների բացահայտման նվազում է գրանցվել, ինչո՞վ է սա պայմանավորված»: Ռուստամ Բադասյանը նախ նշեց, որ իր պատասխանը որպես վերջնական պետք չէ ընկալել, որովհետեւ հարցի պատասխանատուն ոստիկանությունն է:
«Կարծում եմ՝ դա կապված է եղել պատշաճ վիճակագրության վարմամբ, ոչ թե իրական կյանքով, որովհետեւ հանցագործության դեպքերը սկսել են պատշաճ գրանցվել: Պահպանվել են գրանցման ընթացակարգերը, ինչի արդյունքում էլ գուցե թվային տարբերություն է առաջացել: Բացի այդ, համաներման արդյունքում մեծ թվով ազատումներ եղան, եւ կրկնահանցագործության դեպքեր արձանագրվեցին, ինչը, հնարավոր է, որ ազդել է 2019թ.-ի վիճակագրության վրա»,-հավելեց նախարարը:
Լուիզա ՍՈՒՔԻԱՍՅԱՆ
