BBC News-ը պատմում է, թե ինչպես կարելի է հագեցնել մշակութային քաղցը առցանց, և ինչ է դա նշանակում արվեստագետների համար։
Թանգարաններ և պատկերասրահներ
Աշխարհի մի շարք հայտնի և մեծ թանգարաններ և պատկերասրահներ առանց որևէ ճգնաժամի էլ ունեին համապարփակ կայքեր, որոնցով կարելի էր կատարել անվճար էքսկուրսիաներ և ծանոթանալ իրենց լավագույն ցուցանմուշներին։ Այսօր այդ աշխատանքը արագորեն ընդլայնվում է և նոր ձևեր է ընդունում։
Էրմիտաժը Սանկտ-Պետերբուրգում
Կարդացեք նաև
Դեռևս 2001 թվականին Էրմիտաժը դարձավ ունիկալ կինեմատոգրաֆիական փորձի առարկան, երբ ռեժիսոր Ալեքսանդր Սոկուրովը նկարեց այնտեղ իր լեգենդար 1,5 ժամ տևողությամբ «Ռուսական տապան» ֆիլմը, որ պատմում է ռուս ժողովրդի պատմությունը։
Այժմ Էրմիտաժը նույն կերպ առաջարկում է 5 ժամանոց զբոսանք իր սրահներով։
Ոչ պակաս ուշագրավ է երևում նաև 360° շրջապտույտով տեսախցիկով նկարահանված էքսկուրսիան Վատիկանի Պիո-Կլիմենտինոյի և Կիեռամոնտի քանդակագործությունների թանգարաններում։
Նմանատիպ փորձառություն ունի նաև Լոնդոնի Ազգային պատկերասրահը, որը Google Street View ծրագրի միջոցով պատկերասրահի սրահների պանորամային տեսարանն է առաջարկում իր վիրտուալ այցելուներին։
Փարիզի Լուվրն էլ իր հերթին է կազմակերպել մի քանի առցանց էքսկուրսիաներ։ Ամենահետաքրքիր զբոսանքներից մեկը այն պատմական ամրոցը շրջապատող խրամի շուրջ է, որը կառուցվել է դեռևս 1190 թվականին Ֆրանսիայի թագավոր Փիլիպպոս-Օգոստոսի կողմից՝ Փարիզը Սենայի հարձակումներից պաշտպանելու համար, և որը միայն 1792 թվականին՝ Ֆրանսիական հեղափոխությունից հետո, դարձավ թանգարան։ Պահպանվել են թե խրամը, թե դրա վրայով անցնող կամուրջները։
Լուվրի կայքում կարելի է վիրտուալ կերպով հիանալ հին եգիպտական ցուցանմուշներով, ինչպես նաև զբոսնել հայտնի «Ապոլլոն» պատկերասրահով՝ նվիրված Լյուդովիկոս XIV թագավորին։
Օպերա, բալետ, դասական երաժշտություն
Լոնդոնի սիմֆոնիկ նվագախումբը, սկսած մարտի 22-ից, ցուցադրում է իր «Always Playing» առցանց ծրագիրը։ Շաբաթական 2 անգամ՝ հինգշաբթի և կիրակի օրերին բրիտանական ժամանակով ժամը 19-ին (երևանյան ժամանակով ժամը 23-ին), հեռարձակվում են Մեծ Բրիտանիայի լավագույն նվագախմբի ընտրված համերգներ՝ ինչպես ներկայիս, այնպես էլ նախկին ղեկավարների՝ Սայմոն Ռեթթլի և Վալերիյ Գեորգիևի ղեկավարությամբ։
Օպերայի և բալետի թագավորական թատրոնը շաբաթական մեկ անգամ՝ ուրբաթ օրերին Գրինվիչի ժամանակով ժամը 19-ին, YouTube-յան իր ալիքով և Facebook-ի էջով հեռարձակում է իր ամենահայտնի ներկայացումները։ Մոտակա հեռարձակումը կլինի մարտի 27-ին՝ «Պետյան և գայլը» բալետը Սերգեյ Պրոկոֆևի երաժշտության ներքո։
Նույն գործունեությունը՝ ամենօրյա հաճախականությամբ, ծավալել են նաև Սանկտ-Պետերբուրգի Մարիինյան թատրոնը և Նյու Յորքի Մետրոպոլիտեն օպերան
Ռոք, փոփ, ջազ
Այս երեքշաբթի Coldplay խմբի մենակատար Քրիս Մարտինը պլանավորված, սակայն ճգնաժամի պատճառով հետաձգված համերգի փոխարեն ինստագրամյան իր էջում ուղիղ եթերի միջոցով մենահամերգ է տվել հենց իր տնից։
Նույն օրը ինստագրամյան հանդիսատեսի և իր կնոջ՝ կինոաստղ Նիկոլ Քիդմանի համար կրկին տանից ելույթ է ունեցել ամերիկացի քանթրի երգիչ Քիթ Ուրբանը։
Metallica խումբը, որի մեծ տուրը Լատինական Ամերիկայով չեղարկեց համաճարակը, հայտարարել է, այսպես կոչված, Metallica Mondays-ի մասին։ Ամեն շաբաթ երկուշաբթի օրերին խումբը իր էջում կներբեռնի իր լավագույն հիշարժան համերգները։
Ամալյա ՂԱԶԱՆՉՅԱՆ
Արուս ՍՏԵՓԱՆՅԱՆ
