«Կառավարությունը կոռուպցիայի դեմ մասնագիտացված եւ համակարգված պայքար մղելու նպատակով նախաձեռնել է հակակոռուպցիոն մարմինների ձեւավորում: 2019թ.-ին ձեւավորվեց կոռուպցիայի կանխարգելման հանձնաժողովը, իսկ հակակոռուպցիոն կոմիտեի մասին օրենքը լրամշակման փուլում է»,-ԱԺ պետաիրավական հարցերի հանձնաժողովի նիստում այսօր ներկայացնելով ՀՀ կառավարության ծրագրի 2019թ.-ի կատարման ընթացքի եւ արդյունքների մասին զեկույցը՝ ասաց ՀՀ արդարադատության նախարար Ռուստամ Բադասյանը:
«Իսկ հակակոռուպցիոն դատարանը համակարգային մարմնի վերջին բաղկացուցիչն է, որը պատասխանատու է լինելու կոռուպցիոն բնույթի հանցագործությունների դատաքննության համար»,-նշեց նա:
Նախարարի փոխանցմամբ՝ լրամշակման փուլում է նաեւ ոլորտային կոռուպցիոն ռիսկերի վերհանման մեթոդաբանությունը. «Այս հարցում ակտիվ գործակցում ենք կոռուպցիայի կանխարգելման հանձնաժողովի հետ, որի արդյունքում հնարավոր կլինի գնահատել պետական մարմինների ներքին կոռուպցիոն ռիսկերը, մշակել եւ իրականացնել դրանց վերահսկմանն ուղղված գործողությունների ծրագիր»:
Լուիզա ՍՈՒՔԻԱՍՅԱՆ
