ՌԴ Առողջապահության նախարար Միխայիլ Մուրաշկոն մեկնաբանել է լուրերն այն մասին, որ ռուս հայտնի երգիչ Լև Լեշչենկոյի մոտ կորոնավիրուս է հայտնաբերվել, և վերջինս գտնվում է վերակենդանացման բաժանմունքում: Նախարարը ո՛չ հերքել, ո՛չ էլ հաստատել է տեղեկությունը, բայց նշել է, որ Լեշչենկոյի վիճակը դեպի լավն է գնում: 78-ամյա Լև Լեշչենկոյի կնոջ մասին նախարարը ոչինչ չի հայտնել, բայց ԶԼՄ-ների փոխանցմամբ՝ նա ևս հոսպիտալացվել է:
«Պետք է շնորհակալություն հայտնեմ գործընկերներիս, բժիշկ ընկերներիս, քանի որ նրանց ջանքերը դրական արդյունք են տվել: Լև Վալերիանովիչի վիճակը բարելավել է, ինչը չի կարող չուրախացնել նաև բուժաշխատողներին, նրա հարազատներին և երկրպագուներին: Այսօր նա թթվածնի բարձր հարստացման սարքի կարիքը չունի, այդ պատճառով հիվանդության ընթացքը թույլ է տալիս մեզ հույս ունենալ, որ ելքը լավ է լինելու»,-ասել է նախարարն «Առաջին Ալիքի» եթերում:
Միևնույն ժամանակ ռուսական մի շարք լրատվամիջոցներ հաղորդել են, որ ռուս երգիչ, կոմպոզիտոր Իգոր Նիկոլաևը ևս գտնվում է Կոմունարկայի բժշկական կենտրոնում՝ կորոնավիրուսի կասկածանքով:
Ռիա Նովոստի գործակալությունն էլ հաղորդում է, որ Ռոսկոսմոսի ղեկավար Դմիտրի Ռոգոզինը Լև Լեշչենկոյի հետ շփվելուց հետո կորոնավիրուսի թեստ է հանձնել, որի պատասխանը բացասական է:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
