Բժիշկ Սպարտակը ձնծաղիկներ է հավաքում և բաժանում մեկուսացած կանանց

Արսեն Թորոսյանը իր շրջայցի ընթացքում այցելել է նաև Գրողների միության հանգստյան տուն։ Նշենք, որ շրջայցի ընթացում իրեն ուղեկցում է Սևանի հոգեկան առողջության կենտրոնի ղեկավար Դավիթ Կարապետյանը, որը համակարգում է նախարարության մարզային աշխատանքները։

Այստեղ ևս նա ներկայացրեց ծառայություն իրականացնող անձնակազմին։ Բժիշկ Սպարտակը ներկայացրեց իրավիճակը. «Ներկա պահին ունենք 80 հյուր, որոնք իրենց շատ լավ են զգում։ Սպասարկումը կատարվում է ամենաբարձր մակարդակով, ունենք լավ բարերարներ, տարբեր մարդիկ օգնում են մեզ։ Սնունդը բարձրակարգ, բարերարները մատակարարում են մեզ խորովածով, նարնջով, մրգեղենով, կիվի, անանաս, բնական հյութեր …»։

Նախարարը հետաքրքրվեց. «Իսկ ավելի առողջ սնո՞ւնդ»։

Սպարտակը պատասխանեց. «Ունենք տնական մածուն, կաթ, թթվասեր, որոնք հատուկ մեր պարոն Կարապետյանը (Դավիթ Կարապետյանը) բերում է հղիների համար։ Անգամ մեր հղիներից մեկն անհանգստանում էր, երեխայի սրտի զարկը չէր լսում, մեր պարոն Կարապետյանը բերեց հատուկ մասնագետների և սարքավորումներ։ Ներկա պահին հղիները գտնվում են ընտիր վիճակում։ Ամեն ինչ նորմալ է, իրենց շատ լավ են զգում, նույնիսկ այնպես, որ շատերը ուզում են ևս 14 օր երկարաձգեն իրենց այստեղ մնալը»։

Արսեն Թորոսյանը արձագանքեց, որ հույս ունի՝ նման բան տեղի չի ունենա։

Իսկ Դավիթ Կարապետյանը հավելեց. «Ինչ գարունը բացվել է մեր Սպարտակը՝ բժիշկը, վազում է սար առավոտ շուտ, ձնծաղիկներ է հավաքում, բերում բոլոր կանանց բաժանում է»։

Նախարարը արձագանքեց. «Այստեղ մի զուգահեռ իրականություն է գործում։ Իհարկե, դարպասները փակ ենք պահում, որ անցուդարձ շատ չլինի, բայց ներսում կյանքը շարունակվում է այնպես, ինչպես կշարունակվեր առօրյայում։ Հույս ունենք, իհարկե, այս ամենը կարճ կտևի։ Եվ առնվազն 14 օր հետո բոլոր մնացողները կգնան տուն, որևէ դրական արդյունք չենք ունենա։ Սակայն, երբ լինում են առողջական խնդիրներ, նրանք ամեն դեպքում տեղափոխվում են բժշկական հաստատություն»։

Արսեն Թորոսյանը արձագանքեց նաև ուղիղ եթերի մեկնաբանություններին. «Բոլորը գրում են, թե ինչի դիմակով չեք։ Ես դիմակս հիմա հագնում եմ և մտնում եմ ներս։ Դրսում այս պահին դիմակ կրելու անհրաժեշտություն չկա։ Իսկ Սպարտակը դիմակով է, որովհետև իր համար դժվար է ամեն անգամ հանել-հագնել»։

Ամի ՉԻՉԱԿՅԱՆ