Գյումրու կենտրոնական շուկայում տաղավարների ու խանութների մեծ մասը փակ են, փոքր-ինչ աշխուժություն կա « Լաչինի միջանցք» կոչվող հատվածում։ Միս, երշիկեղեն վաճառող տաղավարներն էլ թեեւ բաց են, սակայն մոտ գնացող չկա։
Շուկայի առևտրականները օրավարձով ապրող մարդիկ են, անչափ մտահոգ ազատ տեղաշարժվելու իրավունքի սահմանափակումից՝ նրանք նշում էին՝ եթե վիրուսից էլ չմեռնեն, այս իրավիճակը շարունակվելու դեպքում միգուցե մեռնեն սովից։
«Մի ամիս է՝ առևտուր գրեթե չկա, առավոտից կանգնել եմ, ընդամենը 6 հազար դրամի առևտուր եմ արել, եթե բացօթյա առևտուրն արգելեն, դա նշանակում է գյումրեցիների մեծ մասին սովի կմատնեն: Տեսեք՝ քանի հոգի է ստիպված շուկա կանգնում, ամեն մեկը քանի հոգու է պահում։ Գներն անգամ գցել ենք, օրինակ՝ վարունգի մեկ կիլոգրամը վաճառում էինք 1000 դրամի, հիմա 700 դրամով ես տալիս, բայց առնող չկա․․․
Չգիտեմ՝ ի՞նչ է լինելու, որոշումներ ընդունելուց առաջ թող մեր մասին էլ մտածեն: Վաղը գազի, լույսի տեսուչները իրենց ձեռքերով մեզ կխեղդեն, Աստված չտա՝ մարդասպանություններ լինեն․․․ Եթե էսպես շարունակվեց, կորոնավիրուսից ավելի վտանգավոր աղետ սովը կդառնա, եթե վիրուսից էլ չմեռնենք, ինչ գիտես՝ միգուցե սովից մեռնենք»,-ասաց գյումրեցի տարեց մի մրգավաճառ։
Կարդացեք նաև
Հիշեցնենք, որ վարչապետ Նիկոլ Փաշինյանն ԱԺ-ում երեկ տեղեկացրել էր՝ պարետը պայմանավորվածություն է ձեռք բերել, որ անջատումներ չեն լինի. «Այդ թվում «Գազպրոմ Արմենիա»-ի հետ է ձեռք բերվել պայմանավորվածություն: Ավելի վաղ չէինք ասում, որպեսզի դա կոմունալները չվճարելու ազդանշան չլիներ»:
Նունե ԱՐԵՎՇԱՏՅԱՆ
