Առողջապահության նախարար Արսեն Թորոսյանն այսօր ԱԺ-կառավարություն հարցուպատասխանի ժամանակ ասաց, որ հիվանդների թվի աճմանը զուգընթաց՝ մոտեցումները փոխվում են՝ սկսած նրանից, որ թեթեւ ախտանշաններով հիվանդները հնարավոր է մեկուսացվեն հյուրանոցներում, հիվանդանոց չտանեն: Միջին ծանրության եւ ծանր դեպքերի դեպքում հիվանդանոցային բուժօգնություն է լինելու: Այս քայլին կգնան, եթե իրավիճակը բարդանա:
4 հիվանդանոցներում պատրաստվել են համապատասխան տեղեր՝ մոտավորապես 650 մահճակալ՝ կորոնավիրուսով վարակվածների համար: Նախարարը նաեւ տեղեկացրեց, որ թոքերի 42 սարք կա, որոնցից օգտագործվում է ընդամենը 1-ը. «Գնումների գործընթացի մեջ ենք հիմա, Երեւանում ունենք 7 սարք, որը գնման գործընթացի մեջ է: Հավանաբար, լսած կլինեք, որ աշխարհում նման սարքավորումների դեֆիցիտ կա, երկրները զարգացնում են հզորությունները՝ դրանց արտադրելու: Մատակարարը մնում է էլի Չինաստանը, եվրոպական երկրներն էլ ունեն արտադրություն, բայց ունենք արտահանման սահմանափակում, քանի որ իրենց նույնպես այդ սարքերը պետք են»:
«Լուսավոր Հայաստան» խմբակցությունից Հարություն Բաբայանը հարցրեց. «Ինձ զանգահարել էր մի կին, որի որդին կալանավայրում է ու անհանգստացնող թիվ էր ասում, իբրեւ թե ՔԿՀ-ներից մեկում վարակված մարդ կար: Ես ճշտեցի բարեբախտաբար ՔԿՀ տնօրենից, որ նման բան չկա, բայց մենք ի՞նչ միջոցառումներ ենք անում՝ ՔԿՀ-ներում հնարավոր վարակի դեպքում, ի՞նչ միջոցառումներ պետք է արվեն, խոսքը նաեւ հոգեբուժական հաստատությունների, ծերանոցների մասին է»:
Կարդացեք նաև
Առողջապահության նախարարը պատասխանեց, որ ՔԿՀ-ներում որեւէ հաստատված դեպք չկա: Եթե որեւէ դեպք լինի, ախտանշաններ լինեն, մեկուսացված վայրեր են պատրաստվում՝ նրանց այդ վայրում մեկուսացնելու: Իսկ եթե կլինեն միջին ծանրության կամ ծանր դեպքեր՝ կտանեն հիվանդանոց: Ծերանոցների դեպքում ավելի բարդ է, քանի որ խոցելի խումբ են:
Հռիփսիմե ՋԵԲԵՋՅԱՆ
