«Շատ ահազանգեր ենք ստանում, որ կոմունալների չվճարման պատճառով անջատումներ են անում: Հիմնական ահազանգերը գազին են վերաբերում: Բացի այդ, օրավարձով ապրող մարդկանց թիրախային աջակցություն ցուցաբերվելո՞ւ է վճարումների հարցում: Նրանք տանը նստած են»,-ԱԺ-կառավարություն հարցուպատասխանի ժամանակ այսօր հայտարարեց ԼՀԿ ղեկավար Էդմոն Մարուքյանը:
Վարչապետ Նիկոլ Փաշինյանն արձագանքեց. «Աջակցությունը պետք է լինի հասցեական: Որտեղ պետք է աջակցել, կաջակցենք հանրային միջոցներով: Ճգնաժամից հետո հանրությանը պետք է հաշվետու լինենք, թե որքանով ճիշտ օգտագործեցինք միջոցները»:
Ինչ վերաբերում է կոմունալ վճարներին, Փաշինյանը նշեց. «Հարց է առաջանում՝ պետական աշխատողների կամ ապահովված խավի վճարումներն ինչո՞ւ պետք է հետաձգվեն: Այստեղ էլ պետք է թիրախավորում լինի: Կամ, եթե սոցիալապես անապահովը նպաստ է ստացել փետրվարին, հիմա էլ է ստանում»:
Փաշինյանի փոխանցմամբ՝ պարետը պայմանավորվածություն է ձեռք բերել, որ անջատումներ չեն լինի. «Այդ թվում «Գազպրոմ Արմենիա»-ի հետ է ձեռք բերվել պայմանավորվածություն: Ավելի վաղ չէինք ասում, որպեսզի դա կոմունալները չվճարելու ազդանշան չլիներ: Իսկ նրանց, ովքեր ունեն հնարավորություն, կոչ եմ անում վճարումները չուշացնել»:
Կարդացեք նաև
Լուիզա ՍՈՒՔԻԱՍՅԱՆ
