Ազգային ժողովն այսօր առաջին ընթերցմամբ քննարկում էր «Հանրային հեռուստաընկերությանը» առեւտրային գովազդի հնարավորություն ընձեռելու մասին օրինագիծը, որը հեղինակել է կառավարությունը: Օրինագծի զեկուցող, արդարադատության փոխնախարար Վահե Դանիելյանից պատգամավորները հետաքրքրվեցին՝ եթե գովազդի իրավունքը վերականգնվի, հետագայում պետությունը կվերանայի՞ հանրայինին տրամադրվող ֆինանսավորման չափը: Վահե Դանիելյանը պատասխանեց. «Նախ, չեմ կիսում դիրքորոշումը, թե հանրայինին մեծ գումար է տրամադրվում: Եթե համեմատենք եվրոպական երկրների եւ տարածաշրջանի հետ, հանրայինը վերջին տեղում կլինի: Այդ հարցի վերջնական դիրքորոշումն ունենալու համար պետք է հասկանալ, թե այս փոփոխության ընդունումից հետո որքան գովազդ կունենա հանրայինը»:
Փոխնախարարի խոսքով՝ գովազդի թույլատրումը չի նշանակելու հանրայինի առաքելության փոփոխություն, ավելին՝ գիտակրթական, ճանաչողական եւ տեղեկատվական հաղորդումներն ավելանալու են եւ ավելի լավն են դառնալու. «250 միլիոն դրամի գովազդային եկամուտ է ակնկալվում»:
Գլխադասային հանձնաժողովի ներկայացուցիչ, «Իմ քայլի» պատգամավոր Վահագն Թեւոսյանը նշեց, որ օրինագիծը հանձնաժողովում դրական եզրակացություն է ստացել, «դեմ» քվեարկողներ էլ են եղել:
Կարդացեք նաև
Թեւոսյանի կարծիքով՝ գովազդի իրավունքի վերականգնումն ունի եւ դրական եւ ոչ այնքան դրական կողմեր. «Ոչ այնքան դրականի մասին քանիցս խոսել ենք: Դա այն է, որ կոմերցիոն գովազդի իրավունքի վերադարձը կարող է դժվարություններ ստեղծել մասնավոր հեռուստաընկերությունների համար՝ գովազդ հայթայթելու տեսանկյունից: Բայց կարեւոր է նաեւ գիտակցել, թե ինչին ենք առաջնահերթություն տալիս: Դրական կողմն ուղղված է մասնավոր հեռուստաընկերությունների շահերին: 2015թ.-ին, երբ հանրայինը գովազդից զրկվեց, ասվեց, որ գովազդի կարիք չկա: Բայց հանգամանքների բերումով, նաեւ՝ քաղաքական, այսօր ունենք իրողություն, որ ձեւավորվել է բիզնես իմպերիա, որի հետ փոխկապակցված ընկերությունները միանձնյա տնօրինում են գովազդային շուկան»:
Վահագն Թեւոսյանի բնորոշմամբ՝ հանրայինին գովազդի հնարավորությունը վերադարձնելը կբացառի մեկ ընկերության կողմից գնագոյացման միանձնյա նախաձեռնողականությունը, կստեղծվի մրցակցային միջավայր:
Լուիզա ՍՈՒՔԻԱՍՅԱՆ
