«Հայտնի են մարդիկ, որոնք իրենց խափանման միջոց կալանքը հիվանդանոցում կրում են ամիսներով: Անուններ չտամ, որ չասեն՝ այսինչի հետեւից եմ ընկել: Հիմա քանի՞ կոպեկի արժեք ունի խափանման միջոցը կալանքն ընտրելը, եթե անձը միլիոնատեր է եւ պառկում է հիվանդանոցում, իսկ ով քյասիբ է, ՔԿՀ-ում է: Դուք առաջադեմ բան եք ներկայացնում, բայց վտանգ չկա՞, որ ով փող ունի, կօգտվի սրանից: Միլիոնատերերի՝ հիվանդանոցում պառկելու փորձից ելնելով եմ ասում»,-ԱԺ նիստում այսօր քրեական օրենսգրքում փոփոխությունների փաթեթի առաջին ընթերցման ժամանակ փաթեթի զեկուցող, արդարադատության նախարար Ռուստամ Բադասյանին նման հարցադրում հղեց «Լուսավոր Հայաստան»-ի ղեկավար Էդմոն Մարուքյանը:
Հիշեցնենք՝ օրինագծով սահմանվում է՝ գրավը պետք է դիտարկել ոչ միայն որպես կալանքի այլընտրանքային միջոց, այլեւ որպես ինքնուրույն խափանման միջոց, եւ սա կբերի կալանքի կիրառման դեպքերի նվազմանը:
Ռուստամ Բադասյանը պատասխանեց, որ որեւէ խափանման միջոց ինքնանպատակ չէ. «ՔԿՀ-ներում քյասիբ չկա: Կառավարությունն ամեն ինչ արել է, որ նրանք, ովքեր քաղաքացիական հիվանդանոցում բուժօգնության կարիք ունեն, ստանան այն՝ ցուցման հիման վրա: Ինչ վերաբերում է որոշ հարուստների, որոնք հիվանդանոցում են, այնպես չէ, որ այդտեղ նրանք ազատ շփում են ունենում՝ ում հետ ուզենան: Անկախ հարուստ լինելուց, եթե անձն ունի խնդիր, պետք է բուժվի: Հասկանում եմ ձեր ասածի ենթատեքստը, բայց մենք հիմա լուրջ հսկում ենք, թե արդյոք անձն ունի՞ բուժման կարիք, թե ոչ»:
Կարդացեք նաև
Լուիզա ՍՈՒՔԻԱՍՅԱՆ
