ԱԺ-ն այսօր քննարկում է կառավարության հեղինակած՝ «Առեւտրի եւ ծառայությունների մասին» օրենքում փոփոխությունների օրինագիծն առաջին ընթերցմամբ ընդունելու հարցը:
Օրինագիծը վերաբերում է մեկանգամյա օգտագործման պլաստիկի արգելմանը: Ինչպես նշեց շրջակա միջավայրի նախարար Էրիկ Գրիգորյանը, 2022թ.-ի հունվարի 1-ից առեւտրի օբյեկտներում եւ առեւտրի իրականացման վայրերում կարգելվի պոլիէթիլենային պարկերի եւ տոպրակների օգտագործումը, վաճառքը եւ իրացումը՝ բացառությամբ կշռափաթեթավորման համար նախատեսված եւ երկրորդային ու երկրորդային հումքից արտադրվածների:
Գրիգորյանի փոխանցմամբ՝ մինչեւ օրենքի ուժի մեջ մտնելը ոլորտի 44 արտադրողները հնարավորություն կունենան կենսաքայքայվող պլաստիկից, թղթից եւ կտորից պարկերի արտադրման ուղղությամբ աշխատելու. «Ողջ աշխարհը շարժվում է մեկանգամյա օգտագործման պլաստիկը բացառելու ճանապարհով, քանի որ այն ներթափանցում է հողաշերտ, հայտնվում անգամ ձկների ստամոքսում»:
Կարդացեք նաև
ԼՀԿ պատգամավոր Գեւորգ Գորգիսյանը հարցրեց՝ այն տոպրակները, որոնցով քաղաքացիները սովոր են աղբը թափել, եթե արգելվե՞ն, ապա ի՞նչ լուծում են առաջարկելու. «Որոշ երկրներում, օրինակ, կան աղբի համար հատուկ տոպրակներ, որոնք գնելիս եւ օգտագործելիս քաղաքացին ազատվում է աղբի վճարից»: Նախարարը պատասխանեց, որ հիշատակված տոպրակները երկրորդային հումքից են պատրաստված, ուստի դրանք չեն արգելվելու:
Լուիզա ՍՈՒՔԻԱՍՅԱՆ
