Հարցազրույց բժիշկ-սեքսոլոգ Հովհաննես Հակոբյանի հետ
– Բժիշկ, ձեր մասնագիտությունն ի սկզբանե եղել է ու կլինի թրենդային: Սա, իհարկե, կեսկատակ-կեսլուրջ: Աշխարհում մոլեգնող կորոնավիրուսի առկայության դեպքում, ի՞նչ եք կարծում, սեռական հարաբերություններն է՞լ պետք է սահմանափակել:
– Ընդհանրապես, արտակարգ իրավիճակներում եւ հենց, օրինակ, ամուսինների դեպքում, սեռական ֆունկցիան մեծ մասամբ մղվում է երկրորդային պլան: Համաճարակային աղետներն ու դրանցից բխող իրավիճակները, ինչ խոսք, իրենց ազդեցությունն են ունենում ցանկացած ընտանիքում: Մի փոքր հեռվից գամ՝ մարդն, ըստ էության, կենտրոնանում է իր համար կենսական կարեւոր խնդիրների լուծման վրա եւ դա նորմալ է: Սեռական ֆունկցիան երկու բաղադրիչ ունի. հաճույք ստանալու եւ բազմանալու: Իսկ երբ մարդը հոգեպես լարված է, կոնկրետ՝ մեր օրերում, ունի բազում խնդիրներ, ավելին՝ որոշակի վախեր, բնականաբար, դա խանգարում է լիարժեք հաճույք ստանալուն: Մինչդեռ սեռական հաճույք ստանալու համար անհրաժեշտ է, որ ուղեղը հանգիստ լինի եւ, ընդհանրապես, փաստ է, որ լարվածության պայմաններում ոչ միշտ է, որ, ասենք՝ ամուսինները «հաջողություններ» են գրանցում: Կորոնավիրուս չարիքի դեպքում սեռական հարաբերություններ ասելով եկեք չսահմանափակվենք՝ նկատի ունենալով ամուսնական զույգերին:
– Այսինքն՝ ամուսինները, կրկնում ենք, խոսքը ամուսինների մասին է, կարող են հանգիստ զբաղվել սեքսով:
Կարդացեք նաև
– Իհարկե, կարող են: Սեռական կյանքի հետ կապված կորոնավիրուսը խնդիրներ չի առաջացնում: Եթե նրանք առողջ են կամ այլ գանգատներ չունեն, միանգամայն հանգիստ կարող են ապրել սեռական կյանքով:
Ըստ էության, սեռական կյանքն ավելի լայն հասկացություն է, քան սեռական ակտը: Գուցե կոպիտ հնչի, բայց սեռական ակտը ավելի բնազդային է, մինչդեռ սեռական կյանքն ավելի ընդհանուր գաղափար է, որը ենթադրում է երկու անհատների միջեւ փոխհարաբերություններ: Գանք դարձյալ կորոնավիրուսին. մի կողմից մեկուսանալը գուցե անհրաժե՞շտ է հենց ամուսիններին: Տեսեք՝ շատ հաճախ նրանք այնքան զբաղված են լինում իրենց մասնագիտական աշխատանքով, որ զրուցելու ժամանակ անգամ չեն ունենում: Այո, տանը մնալու օրերը լավ առիթ են ընտանեկան միջավայրում «ջան ասել-ջան լեսելու համար»: Ի վերջո, պետք է գիտակցել, որ սիրով զբաղվելը պարտադիր չէ, որ ավարտվի սեռական ակտով:
– Ձեր խոսքը վերաբերում է ամուսնական զույգերին, բայց չամուսնացածներն էլ ունեն, չէ՞, բնություն: Հնարավոր է, չէ՞, որ սեռական ճանապարհով հաճույք ստանալու ցանկությունն այնքան մեծ լինի, որ մարդը չկարողանա իրեն զսպել:
– Չի բացառվում, հնարավոր է: Բայց հավատացնում եմ, որ նման իրավիճակները այդքան էլ մեծ տոկոս չեն կազմում: Մենք՝ բժիշկներս, խորհուրդ ենք տալիս հնարավորինս զերծ մնալ «ընդհանուր օգտագործման վայրերից» (նկատի ունի հյուրանոցները, մոթելները…):
– Սեքսոլոգիայում առկա է «ինքնաբավարարում» տերմինը…
– Հասկանալի է: Դա համարվում է սեռական կյանքին փոխարինող ձեւ: Ի դեպ, իրավիճակից ելնելով, այն մենք ենք համարում նորմալ կամ պաթոլոգիկ: Նորմալը հիմնականում դեռահասների շրջանում է, որոնց շուրջ 90 տոկոսը զբաղվում է ձեռնաշարժությամբ: Դա, իհարկե, նորմալ է պատանեկան հիպերսեքսուալության շրջանի համար: Կան դեպքեր, երբ մարդն ունի ցանկություն, սակայն չկա հնարավորություն, օրինակ՝ հենց զուգընկերոջ բացակայությունը: Այս խնդիրը տասնամյակների պատմություն ունի: Հայ տղամարդիկ էին, չէ՞, գնում, ասենք՝ ռուսաստաններ, երկարաժամկետ աշխատելու նպատակով… Իմացած եղեք, որ մեր տղամարդկանց մոտ եղել են ու կան այնպիսիները, որոնք պարզապես ցանկություն չեն ունեցել, չունեն՝ դավաճանելու սեփական կնոջը:
– Ձեր խոսքերից երեւում է, որ սեռական հարաբերությունները զուտ անձնական են, ինչը այդպես էլ կա: Հետաքրքիր է՝ այս համաճարակի շրջանում պացիենտներ ունե՞ք: Եթե այո, ապա ի՞նչ հարցերով են նրանք մասնագետին դիմում:
– Ինչպես հայտնի է, այս օրերին բժիշկներս աշխատում ենք հնարավորինս սահմանափակել շփումը պացիենտի հետ, շփվում ենք օնլայն: Դուք ինքներդ ասացիք, որ դա զուտ անձնական է եւ թույլ տվեք չբարձրաձայնել պացիենտներիս հարցերը: Կուզեի մեր հանրությանը տեղեկացնել, որ կորոնավիրուսը սեռական ճանապարհով փոխանցվող հիվանդություն չի համարվում:
– Մենք ավանդապահ ու ավանդապաշտ ազգ ենք, բայց ունենք սեռական կյանքով ապրող փոքրամասնություններ…
– Եկեք չառանձնացնենք ոչ ավանդական սեռական կյանքով ապրող անձանց: Բոլոր տեսակի ու տիպի սահմանափակումների հետ կապված բժշկական խորհուրդները վերաբերում են բոլորին՝ անկախ սեռական կողմնորոշումից…
Զրուցեց
Սամվել ԴԱՆԻԵԼՅԱՆԸ
«Առավոտ» օրաթերթ
24.03.2020
