Կորոնավիրուսը մղել է ստեղծագործական փնտրտուքների
Կորոնավիրուսից պաշտպանվելու դիմակները վերջին շրջանում դառնում են այս տարվա նորաձեւության բաղադրիչներից մեկը: Մինչ կորոնավիրուսային իրավիճակին շատերը տագնապով են մոտենում, որոշ դիզայներներ վարակը համարում են ստեղծագործական խթան: Այստեղից էլ՝ սովորական դիմակը մոդայիկ աքսեսուարի վերածելու մղումներն ու փորձերը:
Kulturologia պորտալի տեղեկացմամբ, Լոնդոնյան նորաձեւության վերջերս կայացած շաբաթի հիթը հենց տարատեսակ դիմակներն էին: Օրինակ, The Blonds-ը ներկայացրեց գունեղ դիմակների եւ բժշկական արտահագուստի ինքնատիպ մոդելներ, որոնք ստեղծել էին դիզայներներ ֆիլիպը եւ Դեյվիդը: Սեզոնի հիթ համարվող ոսկեգույն կոմբինեզոնը համադրված էր նույն գույնի բժշկական դիմակով:
Հետաքրքիր հավաքածու ներկայացրեց իտալական Off-White-ը, որոնց մեջ դիմակների մի մասը լոգոտիպով էր, մյուս մասն առանց լոգոտիպի, հատկապես լավ ընդունվեցին թեւիկներով բժշկական դիմակները, որոնք մասսայական վաճառքի են դրված: Ի դեպ, որոշ բրենդների դիմակները բավականին թանկ արժեն:
Կարդացեք նաև
Չինացի դիզայներներն ու գնորդները, սակայն, բացակայում էին Լոնդոնյան նորաձեւության շաբաթից, բացակայում էին նաեւ այդ երկրի լրագրողները, այն դեպքում, երբ ցուցադրությունների մեկնարկը տրվեց չինացի դիզայներ Յուհան Վանգի հավաքածուով: Նրան հաջողվել էր Մեծ Բրիտանիա հասնել ավելի շուտ, քանի մտցվել են օդանավային եւ սահմանային արգելքները: Չինացի այլ դիզայներներ չէին կարողացել ժամանել Լոնդոն՝ կորոնավիրուսի պատճառով:
Բրիտանական նորաձեւության խորհրդի ղեկավար Քերոլայն Ռաշը հայտնել էր մեծ թվով դիզայներների բացակայության մասին, ասել նաեւ, որ կորոնավիրուսը հարվածել է նորաձեւության ոլորտին, որովհետեւ ֆաբրիկաները չեն աշխատում, լավագույն մասնագետներից շատերն ինքնամեկուսացած են կամ մեկուսացած:
Ի դեպ, սոցցանցերում դիմակի իրենց տարբերակներն են ներկայացրել նաեւ տարբեր երկրների շոու բիզնեսի, հեռուստաաստղեր եւ հայտնի մարդիկ: Ռուսական շոու բիզնեսի ներկայացուցիչներ ֆիլիպ Կիրկորովն ու Յանա Ռուդկովսկայան դիմակներով սելֆի են հրապարակել: Աֆրիկացի հեռուստահաղորդավար Ֆոլու Ստորմսը ավելի հեռուն է գնացել. Africa Magic Viewers Choice Awards-ին մրցանակը ստանալու համար նա ներկայացել է դիմակով:
Հեռուստաաստղը տուն վերադառնալով գրառում է կատարել, որ մրցանակաբաշխության ժամանակ որեւէ մեկը ուշադրություն չի դարձրել միմյանցից հեռավորություն պահելու՝ սոցցանցերում արած իր կոչերին ու հորդորներին: Նա եւս մեկ կոչ է արել՝ պահպանել առողջությունը, հաճախ լվանալ ձեռքերը, դեմքով չհպվել միմյանց եւ չգրկախառնվել:
Kulturologia-ն հղում անելով հոգեբաններին՝ նշում է, որ դիմակ կրելն օգտակար է հոգեբանական առումով, այդպիսով մարդն իրեն ավելի ապահով է զգում եւ պաշտպանված, իսկ լավատեսությունը բարձրացնում է օրգանիզմի դիմադրողականությունը, բնականաբար, գեղեցիկ դիմակների փնտրտուքն էլ մարդկանց կտրում է առօրյա ծանր հոգսերից:
Պատրաստեց Գոհար ՀԱԿՈԲՅԱՆԸ
Լուսանկարները՝ Kulturologia-ի կայքից:
