ԱԺ նիստում այսօր ԼՀԿ պատգամավոր Աննա Կոստանյանը բարձրաձայնեց, որ որոշ կառույցներում օպտիմալացման քողի ներքո են տեղի ունենում կրճատումներ:
«Ազգային կինոկենտրոնից եւ գրադարանների աշխատակիցներից ահազանգեր եմ ստացել աշխատանքից ազատման մասին՝ այն դեպքում, երբ աշխատանքից ազատումը տրամաբանական, իրավական եւ կառավարության հայտարարած օպտիմալացման համատեքստում չի տեղավորվում»,-հայտարարեց պատգամավորը:
Նա նշեց, որ բողոքներ է ստացել նաեւ Մալաթիա Սեբաստիա վարչական շրջանի կենտրոնական գրադարանի 11 աշխատակցից. «Տնօրենը ոչ պատշաճ ձեւով է ներկայանում աշխատանքի, աշխատողներին շանտաժի ենթարկում, անհարգալից վերաբերվում: Սրանով պայմանավորված՝ նրանց հեռացրել են աշխատանքից»:
Աննա Կոստանյանի խոսքով՝ որոշ քաղաքացիներ բարձրաձայնում են, որ պետական կառույցների որոշ աշխատակիցներ եւ տնօրեններ շեշտում են նախարարությունների, ԱԺ-ի եւ քաղաքապետարանի կողմից հովանավորչություն ունենալու հանգամանքը՝ դա դարձնելով դրոշակ եւ վստահեցնելով, որ իրենց թիկունքն ուժեղ է, կարող են ուզածն անել:
Կարդացեք նաև
ԱԺ փոխխոսնակ Ալեն Սիմոնյանն արձագանքեց. «Եթե կան մարդիկ, որոնք դեռ մտածում են, որ իրենք անձեռնմխելի են կամ մեջք ունեն, ուրեմն՝ չեն հասկացել, թե ՀՀ-ում ինչ է տեղի ունեցել: Մենք շատ արագ նրանց դա կհասկացնենք: Եթե գիտեք նման դեպքեր, տեղեկացրեք»:
Լուիզա ՍՈՒՔԻԱՍՅԱՆ
