«ՀՀ տարածքում արգելվում է տնտեսական գործունեության տեսակներով զբաղվելը՝ բացառությամբ ՀՀ պարետի նոր որոշմամբ սահմանված կետերի և գործունեության տեսակների: Նախատեսված բացառություններով՝ թույլատրվում է իրականացնել տնտեսական գործունեության շրջանակներում խոհանոցների գործունեություն՝ սննդի պատրաստում և բուֆետների գործունեություն: Տնտեսվարողների մոտ ճաշարանների և խորտկարանների ծառայությունները չեն արգելվի»,- քիչ առաջ հրավիրված մամուլի ասուլիսի ընթացքում պարզաբանեց ՀՀ Էկոնոմիկայի նախարարի տեղակալ Վարոս Սիմոնյանը:
Նախարարի տեղակալը հայտնեց, որ բացառությունների շարքում են նաև մետաղադրամի միջոցով գործարկվող լուսանկարչական ավտոմատների գործունեությունը, ճնշման չափման սարքավորումները կամ կոմունալ վճարների Telcell սարքերի գործունեությունը:
Վարոս Սիմոնյանն հիշեցրեց՝ առևտրի կենտրոնների, մոլերի գործունեության նկատմամբ կան սահմանափակումներ, միևնույն ժամանակ հստակեցրեց. «Առևտրի իրականացման վայրերի գործունեությունն արգելվելու է՝ բացառությամբ այդ վայրերում գործող պարենային խանութների, դեղատների, գյուղատնտեսական ապրանքների շուկաների: Օրինակ՝ «Երևան մոլի» գործունեության նկատմամբ կիրառվում է սահմանափակում. այն չի գործում, բայց այնտեղ գործող պարենային խանութը և դեղատունը հանգիստ կարող են աշխատել»:
Հիշեցմանը՝ վաղվանից փակվելու են «Պրես ստենդի» կրպակները և դիտարկմանը՝ ըստ էության փորձում են լռեցնել մամուլը, հետևաբար ո՞վ է վճարելու լրագրողների աշխատավարձերը, Վարոս Սիմոնյանը պարզաբանեց. «Սրանք այն միջոցառումներն են, որոնք ուղղված չեն տնտեսական գործունեության դադարեցմանը կամ որևէ ձևով ճնշումներ գործադրելուն, բիզնեսին վնաս տալուն: Սրանք պարտադրված գործողություններ են՝ ուղղված բոլորիս առողջության ապահովմանը: Եթե կիրառում են սահմանափակումներ, դրանք ոչ միայն կարող են վերաբերվել մամուլին, այլև այլ տնտեսվարողներին: Խնդրում ենք ըմբռնումով մոտենալ այս միջոցառումներին, որոնք ուղղված են նոր կորոնավիրուսի տարածման կանխարգելմանը»:
Կարդացեք նաև
Լրագրողները փաստեցին՝ Վրաստանի տարածքում գտնվող բեռնատարների հոսքին և գոյություն ունեցող հերթերին վերաբերող ահազանգեր կան: Ասուլիսին պարզաբանվեց, որ երեկվանից՝ ժամը 17.00-ից սկսած մեր բեռնատարները սկսել են հատել Հայաստան-Վրաստան սահմանը, մասնավորապես, նախապատվություն է տրվել շուտ փչացող մթերքներին:
Նախարարի տեղակալը հավելեց. «Տարանցիկ բեռնափոխադրումները Վրաստանի տարածքով իրականացվում են միայն ուղեկցությամբ. մի անցակետից մյուս անցակետ անցումը կատարվում է ոստիկանի ուղեկցությամբ: Մինչև ուղևորվելը մեքենաներն ախտահանվում են: Օրինակ, եթե Մառնեուլիից ուղևորվում են վերին Լարս, նույնպես ախտահանվում են, հետո հատում ՌԴ սահմանը: Իսկ Վրաստանի Հանրապետություն ներմուծումների դեպքում ստուգում է իրականացվում՝ արդյոք վարորդը եղե՞լ է համաճարակային ռիսկային գոտում: Եթե այո, ապա ընդհանրապես չի թույլատրվում մտնել Վրաստան: Եթե անհրաժեշտություն է լինում, հոսպիտալացնում են»:
Տաթև ՀԱՐՈՒԹՅՈՒՆՅԱՆ
