«Պարոն Պետրոսյան, խնդիրն այն չէ, որ մենք չենք ուզում աշխատել: Խնդիրն այն է, որ մենք պետք է մեզանով օրինակ ծառայենք ժողովրդին: Արտակարգ դրություն է հայտարարված, բայց փողոցներում շատ մարդ կա, կյանքը շարունակվում է, վարակակիրների թիվն ավելանում է ամեն օր: Ասում ենք՝ վա՜յ, ինչո՞ւ է ավելանում: Ավելանում է, որովհետեւ մենք այսպես ենք վերաբերվում այս ամենին»,-ԱԺ ամբիոնից այսօր արձագանքելով ԲՀԿ պատգամավոր Գեւորգ Պետրոսյանի նկատառմանը՝ հայտարարեց «Լուսավոր Հայաստան» խմբակցության ղեկավար Էդմոն Մարուքյանը:
Հիշեցնենք՝ նիստի մեկնարկին նա ԱԺ նախագահ Արարատ Միրզոյանին առաջարկեց քաղաքական պայմանավորվածության գալ, քվորում չապահովել եւ նիստ չանել, քանի որ ժողովրդին կոչ են անում տանը նստել, իսկ իրենք հավաքվում են առանց դիմակի, չեն պահպանում անհրաժեշտ ցուցումները: Արարատ Միրզոյանն էլ պնդեց, որ կյանքը շարունակվում է, եւ խորհրդարանը պետք է իրականացնի իր օրենսդիր գործունեությունը:
Էդմոն Մարուքյանը մի երկրի օրինակ պատմեց. «31-րդ վարակակիրը գնում է ծնունդի, որից հետո երկրի բնակչության վարակակիրների 60%-ին վարակողն է դառնում: Մի մարդը… Մենք ունենք պատգամավորներ, որոնք Ֆրանսիայից եւ այլ երկրներից են եկել, 14 օր չեն ինքնամեկուսացել, 1000 ու մի բան կա: Եթե մենք լուրջ չենք վերաբերվում, պարոն Պետրոսյան, որեւէ մեկը լուրջ չի վերաբերվի: Հենց մենք պետք է լուրջ վերաբերվենք: Եթե մենք լուրջ չենք վերաբերվում, ժողովուրդը ո՞նց լուրջ վերաբերվի, ասում է՝ «ա՜, սուտ բան է, այ ախպեր, ոչ մի բան չկա», ու ամեն օր վարակվածների թիվն ավելանում է»:
Պատգամավորը պնդեց՝ նիստի օրակարգում հիմա «օրհասական» նախագծեր չկան, ուստի միայն ԱԺ խորհուրդը կարող է աշխատել. «Եթե շարունակենք նիստեր անել, խորհրդարանի 400-700 աշխատողներ պետք է գան աշխատանքի, եւ մենք վատ օրինակ ծառայենք երկրին: Եթե համաձայն չեք, մենք կաշխատենք, դա չէ հարցը»:
Կարդացեք նաև
ԱԺ փոխնախագահ Վահե Էնֆիաջյանն արձագանքեց, որ խորհրդարանը ոչ միայն օրակարգի շրջանակում է գործում, այլեւ հայտարարությունների ժամ կա. «Բնականոն գործունեությունը պետք է իրականացնենք»:
Հիշեցնենք, որ կորոնավիրուսի տարածումը կանխարգելելու նպատակով ՀՀ-ում մինչեւ ապրիլի 14-ը հաստատված է արտակարգ դրություն:
Լուիզա ՍՈՒՔԻԱՍՅԱՆ
