Ինչպես արդեն հայտնել էինք, երկուշաբթի՝ մարտի 23-ին Հայաստանում հաստատվել է կորոնավիրուսի 41 նոր դեպք։ Ընդհանուր վարակվածների թիվը կազմում է 235։
Առողջապահության նախարար Արսեն Թորոսյանը իր ուղիղ միացման ընթացքում անդրադարձավ այս ցուցանիշին։
«Եթե հաշվենք որպես մեկ օրվա ցուցանիշ, շատ մեծ ցուցանիշ է։ Սակայն, չպետք է մոռանանք, որ երեկ մենք արել ենք շատ քիչ հետազոտություններ և ունեցել ենք չորս դրական արդյունք։ Եվ եթե գումարենք երկու օրվա արդյունքները՝ 41+4, և բաժանենք երկուսի կստացվի, որ մենք կիրակի և երկուշաբթի օրերը ստացել ենք օրական 21.5` կամ 21, կամ 22 արդյունք։ Ինչն ավելի ցածր է, քան նախորդ օրերի ցուցանիշները»,- ասաց նա։
Նախարարի խոսքերով՝ դա չի նշանակում, որ հիվանդությունը չի տարածվում. «Մենք ամեն դեպքում փորձում ենք ամեն դեպքի հետևից գնալ, կատարել մեկուսացումներ և ինքնամեկուսացումներ»։
Կարդացեք նաև
Անդրադառնալով առնվազն մեկ շաբաթով գործունեության տարբեր տեսակների սահմանափակմանը Արսեն Թորոսյանն ասաց, որ դա շատ կարևոր է հակահամաճարակային միջոցառումների համար. «Մնա տանը լոզունգը շատ կարևոր է մեզ բոլորիս համար մոտակա շաբաթներին։ Մինչև մենք կարողանանք մեր գործողություններն իրականացնենք։ Որովհետև, եթե մեծ թվով քաղաքացիներ են վարակվում շատ դժվար է լինում այդ ամենին հետևելը և բոլորի հետևից գնալը՝ անկախ պետության ունեցած ռեսուրսներից»։
Նա նշեց, որ մի քանի օր է մնացել մի քանի հիվանդանոցների վերազինումը ժամանակին հասցնելու համար. «Մեզ մի քանի օր ժամանակ է մնացել մոտ 500-600 հավելյալ մահճակալ ունենալու համար Հայաստանի Հանրապետությունում միայն այս հիվանդությամբ մարդկանց բուժելու կամ առնվազն հսկողության տակ պահելու համար»։
Ամի ՉԻՉԱԿՅԱՆ
