«Իսկապես խրախուսում ենք կառավարության արագ արձագանքը ստեղծված իրավիճակի վերաբերյալ, մեր գրավոր առաջարկների մեծ մասը հաշվի են առել: Բայց այլ լրացումներ էլ են կատարվել, որոնց հետ անվերապահորեն համաձայնել չենք կարող»,-ԱԺ նիստում այսօր հայտարարեց ԲՀԿ պատգամավոր Գեւորգ Պետրոսյանը:
Հիշեցնենք, որ ազգային ժողովն այսօր ընդունեց հրատապության ռեժիմով կառավարության բերած՝ ՀՀ քրեական եւ վարչական իրավախախտումների վերաբերյալ օրենսգրքերում փոփոխությունների օրենսդրական փաթեթը, որը վարչական եւ քրեական պատիժ է սահմանում արտակարգ դրության պայմաններում մեկուսացման ռեժիմը խախտող քաղաքացիների եւ տեղեկատվության տարածման սահմանափակումները խախտող ԶԼՄ-ների համար:
Գեւորգ Պետրոսյանը նշեց. «Հումորի վերածելու ցանկություն բացարձակ չունեմ, բայց ո՞նց ենք ճշտելու՝ այդ պահին հղի՞ է, թե՞ ոչ: Կամ, այդ պահին ինչի՞ց ենք ենթադրում, որ անձն անչափահաս է: Վտանգավորությունն արարքի դիտավորության մեջ է, իսկ այս դեպքում ստացվում է, որ մարդը ոչ դիտավորյալ կարող է վարակել հղի կնոջը: Որեւէ մեկին չի կարելի վարակել, բայց եթե մարդը, չիմանալով անձի հղի վիճակի մասին, ավելի ծանր պատասխանատվության է ենթարկվում, սա չի բխում արդարության սկզբունքից»:
Նշենք, որ ըստ փաթեթի՝ մեկուսացման եւ ինքնամեկուսացման ռեժիմի խախտմամբ այլ անձանց դիտավորությամբ վարակելը, կախված հետեւանքից, վարչական եւ քրեական պատասխանատվություն է ենթադրում:
Կարդացեք նաև
Պատգամավորի մտահոգությանն արձագանքելով՝ ՀՀ արդարադատության նախարար Ռուստամ Բադասյանը նշեց, որ քրեական օրենսգրքում նախատեսվող փոփոխություններով՝ «ակնհայտ» եզրույթից հրաժարվում են:
Իսկ «Իմ քայլի» պատգամավոր, պետաիրավական հարցերի հանձնաժողովի նախագահ Վլադիմիր Վարդանյանը հստակեցրեց. «Օրենքի նախագծում օգտագործվում է «ակնհայտ հղի կնոջ նկատմամբ» արտահայտությունը: Մենք այդպես էլ դիտարկել ենք: Իսկ նախարարի ասած օրինագծում կիրառվում է «հղի» բառը՝ «ակնհայտ հղի» արտահայտության փոխարեն»:
Վարդանյանը նաեւ համոզմունք հայտնեց, որ առանց այս օրենսդրական փաթեթի՝ կորոնավիրուսի տարածումը կանխելը հնարավոր չէ:
Հիշեցնենք, որ կորոնավիրուսի տարածումը կանխարգելելու նպատակով ՀՀ-ում մինչեւ ապրիլի 14-ը հայտարարված է արտակարգ դրություն:
Լուիզա ՍՈՒՔԻԱՍՅԱՆ
