Ազգային ժողովում այսօր ԲՀԿ առաջնորդ Գագիկ Ծառուկյանից լրագրողները հետաքրքրվեցին՝ «այս օրերին շատ մարդիկ եւ կազմակերպություններ դրամական օգնություն են փոխանցում կորոնավիրուսի դեմ պայքարի պետական հիմնադրամին, դուք պատրաստվո՞ւմ եք»: Ծառուկյանը պատասխանեց. «Իհարկե, ո՞նց կարող է Ծառուկյանն ինչ-որ բան չպատրաստել: Դա միշտ արել ենք, անում ենք: Այսօր հանձնարարել եմ: Քանի որ կորոնավիրուսով հիվանդների մեծամասնությունը Նորքի հիվանդանոցում են, այդտեղ խնդիրներ կան, բոլոր հիվանդներն այդտեղ են, ես արդեն հաշվեհամարը վերցրել եմ, որ այդտեղ 35 միլիոն միայն հիվանդների համար եմ փոխանցել, որ կարողանան ապաքինման համար անհրաժեշտ ամեն ինչը…տնօրենի հետ ենք պայմանավորվել: Տասը միլիոն էլ, որպես պարգեւատրում, հիվանդանոցի բուժաշխատողների համար է, որ առավոտից երեկո աշխատում են: Բացի այդ, Գյումրիում էլ քսան հիվանդ կա, տասը միլիոն հիվանդների համար ենք փոխանցել, հինգ միլիոն էլ՝ բժիշկների, որպես պարգեւավճար»:
-Աբովյանից բողոքում են, որ դեպի Երեւան անվճար տրանսպորտը վերջին օրերին չի գործում, ինչո՞վ է պայմանավորված:
-Ես տեղյակ չեմ, կառավարությանը հարցրեք: Բայց անվճարը գործում է:
-Չի գործում, ասում են:
Կարդացեք նաև
-Անվճարը չի կարող չգործել:
-Դուք շատ աշխատակիցներ ունեք, վնասներ կրե՞լ եք, աշխատողները գնո՞ւմ են գործի:
-Հիմա աշխարհով մեկ տնտեսական ճգնաժամ է, բայց պարոն Ծառուկյանը ձեզ երկու ամիս առաջ էր ասել, որ տնտեսական ճգնաժամի նախանշաններ կան: Եթե Ծառուկյանի ասածը լսեին, նախապատրաստական աշխատանք անեին, հիմա այսպես չեր լինի: Բայց հիմա չեմ ուզում մեղադրել, թե ով ինչ չի արել: Հիմա բոլորս միասնական պետք է լինենք, սա բոլորիս խնդիրն է:
-Մարդիկ աշխատո՞ւմ են:
-Աղջիկ ջան, եթե արտակարգ իրավիճակ է, արգելել են, ես ո՞նց կարամ ասեմ…
-Վճարո՞ւմ եք աշխատողներին:
-Բայց ես ինչո՞ւ պետք է վճարեմ: Պետությունն արտակարգ իրավիճակ է հայտարարել եւ պարտավոր է իր ժողովրդին, ով չի աշխատում, գումար տրամադրի…
-Այսինքն, հարկադիր արձակուրդի համար չեք վճարելո՞ւ աշխատողներին:
-Աղջիկ ջան, ինչքան դատարկ-դատարկ դու կարաս խոսաս: Աղջիկ ջան, ես սովորական քաղաքացի եմ, պետությունը որոշել է արտակարգ իրավիճակ հաստատել: Եթե արտակարգ իրավիճակի որոշողը Ծառուկյանը լիներ, այնպես կաներ, որ ամեն ինչ իր տեղում լիներ…
Հիշեցնենք, որ կորոնավիրուսի տարածումը կանխարգելելու նպատակով ՀՀ-ում մինչեւ ապրիլի 14-ը հայտարարված է արտակարգ դրություն:
Լուիզա ՍՈՒՔԻԱՍՅԱՆ
