Ազգային ժողովն այսօր երկրորդ ընթերցմամբ եւ ամբողջությամբ միաձայն ընդունեց հրատապության ռեժիմով կառավարության բերած՝ ՀՀ քրեական եւ վարչական իրավախախտումների վերաբերյալ օրենսգրքերում փոփոխությունների օրենսդրական փաթեթը, որը վարչական եւ քրեական պատիժ է նախատեսում արտակարգ դրության պայմաններում մեկուսացման եւ ինքնամեկուսացման ռեժիմը խախտող քաղաքացիների համար:
Ըստ այդմ, մեկուսացման կամ ինքնամեկուսացման կանոնը խախտելը կենթադրի վարչական պատասխանատվություն, իսկ քրեական տեսանկյունից արարքը հանցագործություն կհամարվի, եթե կանոնը խախտելու հետեւանքով կվարակվի մեկ այլ անձ. եթե նույն արարքը ծանր վնաս է պատճառել մարդու առողջությանը, օրինակ՝ որեւէ օրգանի գործունեության ամբողջական դադարում, ապա սահմանվում է 500.000-700.000 դրամ տուգանք, կալանք՝ 1-3 ամիս ժամկետով, կամ առավելագույնը երկու տարի ժամկետով: Իսկ եթե մեկուսացված կամ ինքնամեկուսացված անձի՝ կանոնները խախտելու հետեւանքով մեկ այլ անձի անզգուշությամբ մահ կպատճառվի, պատիժը կլինի 2-4 տարվա ազատազրկում, նաեւ՝ գործունեության որոշակի տեսակներից կամ պաշտոնից զրկում:
Օրենսդրական փաթեթի ընդունմանը «կողմ» էր քվեարկել 117 պատգամավոր:
ԱԺ նախագահ Արարատ Միրզոյանն աշխատակազմին հորդորեց իր աշխատանքը կազմակերպել հնարավորինս արագ, որպեսզի ընդունված փաթեթը ստորագրի եւ ուղարկի ՀՀ նախագահին՝ հաստատման:
Կարդացեք նաև
Հիշեցնենք, որ կորոնավիրուսի տարածումը կանխարգելելու նպատակով ՀՀ-ում մինչեւ ապրիլի 14-ը հայտարարված է արտակարգ դրություն:
Լուիզա ՍՈՒՔԻԱՍՅԱՆ
