«Խրախուսեք, որ երեխաները շատ կարդան»,- այսօրվա ֆեյսբուքյան համազգային ծնողական ժողովի ժամանակ ծնողներին հորդոր ուղղեց ՀՀ ԿԳՄՍ նախարար Արայիկ Հարությունյանը: Նախարարը ծնողներին էլ հորդոր ուներ՝ լուրջ վերաբերվել արտակարգ դրության պայմաններում հայտարարված հեռավար կրթության գործընթացին, հետեւել առողջապահության նախարարության եւ պարետատան հաղորդագրություններին, խստորեն պահպանել ցուցումները:
Նախարարը ծնողներին, ուսուցիչներին եւ տնօրեններին հորդորեց նաեւ հեռավար կրթության համար հետեւել եւ օգտվել ՀՀ ԿԳՄՍ-ի կայքից, քանի որ տեղեկություններ եւ ահազանգեր են ստացել այն մասին, որ որոշ անհատներ փորձել են հեռավար ուսուցման վճարովի ծառայություններ առաջարկել:
Նախարարը հստակեցրեց՝ տանը մնալը արձակուրդ չէ երեխաների համար, ուստի պետք չէ էքսկուրսիաներ կազմակերպել: Ծնողներին հորդորեց՝ ուշադիր լինել եւ հետեւել, որ երեխաները էլեկտրոնային հարթակներով կապ պահպանեն ուսուցիչների հետ: Հ1-ով հեռարձակվող դասերն էլ, ըստ նախարարի, դուր են եկել ոչ միայն երեխաներին, այլ նաեւ ծնողներին, տատիկ-պապիկներին: Արայիկ Հարությունյանն ասում է՝ այս ժամանակահատվածը պետք է օգտագործել կրթական ցենզը եւ զարգացվածության մակարդակը բարձրացնելու համար: Բացի Հ1-ից, ձայնագրված դասեր են հեռարձակվելու նախարարության ֆեյսբուքյան եւ յութուբյան էջերով: Նախարարը լավ է հասկանում՝ հեռավար կրթությունը չի կարող փոխարինել առկա ուսուցումը դպրոցներում, բայց փորձում են լցնել դադարը:
Նախարարը նաեւ երեխաների եւ ծնողների առցանց անվտանգության կանոններն է հրապարակել:
Կարդացեք նաև
Անընդհատ հեռուստացույցի եւ համակարգչի էկրանների առջեւ նստելուց առողջական խնդիրներից խուսափելու համար նաեւ ֆիզկուլտուրայի դասեր կլինեն՝ Հ1-ով:
Արայիկ Հարությունյանն անդրադարձավ ավարտական դասարանների եւ միասնական քննությունների հարցին: Նախարարն ասաց՝ հեռավար ուսուցման երկշաբաթյա արդյունքները ամփոփելուց հետո, կորոշվի՝ դասերը երկարացվո՞ւմ են եւ որքա՞ն դասեր են անհրաժեշտ: Հաշվի են առնվում այն, որ որոշ շրջաններում համացանցի խնդիր կա, որ ուսուցիչների եւ երեխաների մի մասը էլեկտրոնային սարքերի խնդիր ունեն, այս բոլոր տեղեկությունները հավաքվում են, կամփոփվեն եւ որոշումներն ըստ այդմ կկայացվեն:
Այօր երեկոյան Արայիկ Հարությունյանը կընթերցի Էքզյուպերիի Փոքրիկ իշխանը:
Այլ մանրամասները՝ տեսանյութում
https://www.facebook.com/arayik.harutyunyan/videos/10158130032898501/?__tn__=%2CdC-R-R&eid=ARAKR7qwSa1f-QKuk7IdbgnZkF9IGf9wFZ7GEvmV7f6wbBKooKszfKSuEyX9tqq5UVySkSCbyi-W3LxN&hc_ref=ARQrRvPSH1qtlGklewcKnKyULi_7LzCXBJOR-Bqzy2KpnKcnIcsxelhT-1HkRmHI-AI&fref=nf
Նելլի ԳՐԻԳՈՐՅԱՆ
