Այսօր Զինված ուժերի ռազմաբժշկական վարչության պետ Սահակ Օհանյանից լրագրողները հետաքրքրվեցին՝ զորակոչը կհետաձգվի՞, եթե՝ այո, որքա՞ն ժամանակով: Օհանյանը կառավարության մամուլի սրահում, պատասխանելով այդ հարցին, ասաց, որ զորակոչն իր պատասխանատվության ներքո չէ, եւ համապատասխան ղեկավարները որոշում կկայացնեն եւ հանրությանը կիրազեկեն:
Վարչության պետն ուրախալի համարեց, որ զինված ուժերում ոչ միայն կորոնավիրուսի դեպք չի արձանագրվել, այլեւ, սահմանափակումների հետեւանքով կտրուկ նվազել է սուր շնչառական հիվանդությունների քանակը. «Վերջին տասը տարվա ընթացքում Զինված ուժերում հիվանդությունների եւ նաեւ ինֆեկցիոն հիվանդությունների այսպիսի ցածր ցուցանիշ չենք ունեցել»:
Հարցին՝ արդյոք կորոնավիրուսի տարածման այս իրավիճակում կարիք կա՞ սննդատեսակներն ավելացնելու՝ իմունային համակարգն ամրապնդելու համար, Սահակ Օհանյանը պատասխանեց. «Խորը աշնանը, ձմռանը եւ վաղ գարնանը Զինված ուժերում կիրառվում է վիտամին C-ի միջոցով վիտամինիզացիա, իսկ ապրիլի 15-ից այդ վիտամինիզացիան բժշկական ծառայությունն է իրականացնում: Ապրիլի 15-ից շարունակական բնույթ է կրելու արդեն թիկունքային ծառայությունների կողմից եւ սննդակարգի մեջ նաեւ ավելացվելու է վիտամին C-ն: Զինված ուժերում սննդի որակն ակնհայտ է, որ լավացել է, ե՛ւ տեսականին ե՛ւ որակը: Գտնում եմ, որ յուրահատուկ միջոցառումներ կիրառելու կարիք չկա»:
Սահակ Օհանյանն ասաց, որ բուժանձնակազմը մեկ ամիս է՝ շատ խիստ ռեժիմով է աշխատում, եւ ամեն ինչ անում են, որ կորոնավիրուսը զինված ուժեր չթափանցի:
Կարդացեք նաև
Լուսինե ԲՈՒԴԱՂՅԱՆ
