Ինչպես ավելի վաղ հայտնել էինք, այսօր ԱԺ-ն արտահերթ նիստ է անում՝ առաջին ընթերցմամբ ընդունելու համար հրատապության ռեժիմով կառավարության բերած՝ ՀՀ քրեական եւ վարչական իրավախախտումների վերաբերյալ օրենսգրքերում փոփոխությունների օրենսդրական փաթեթը, որը վարչական եւ քրեական պատիժ է նախատեսում արտակարգ դրության պայմաններում մեկուսացման ռեժիմը խախտող քաղաքացիների համար: Պատգամավորները հետաքրքրվեցին՝ ո՞րն է մեկուսացումը, իսկ որը՝ ինքնամեկուսացումը:
Օրենսդրական փաթեթի զեկուցող, ՀՀ արդարադատության փոխնախարար Վահե Դանիելյանը տեղեկացրեց՝ ինքնամեկուսացման դեպքում անհրաժեշտ է, որպեսզի քաղաքացուն ուղղված ինքնամեկուսացման ցուցում լինի, եւ անձն իր բնակարանում, այլ բնակարանում կամ մեկ այլ վայրում պետք է մեկուսանա մյուս անձանցից. «Իսկ մեկուսացումը տեղի է ունենում հատուկ սահմանված վայրերում, որտեղ տեղափոխվում են հիվանդ անձինք եւ նրանք, ովքեր շփվել են նրանց հետ»: Իսկ թե ով է այդ ցուցումը տալու, Վահե Դանիելյանը նշեց՝ այն տալիս է պատերը եւ որոշում այն վայրերը, որտեղ անձինք մեկուսացվում են:
«Սա չի տարածվում այն դեպքերի վրա, երբ անձը, սեփական նախաձեռնությամբ, ելնելով սոցիալական պատասխանատվությունից, ինքնամեկուսանում է»,-շեշտեց փոխնախարարը:
Կարդացեք նաև
Հիշեցնենք, որ կորոնավիրուսի տարածումը կանխարգելելու նպատակով ՀՀ-ում հայտարարված է արտակարգ դրություն: Նշյալ օրենսդրական փաթեթը քննարկվում է առաջին ընթերցմամբ, երկուշաբթի տեղի կունենա երկրորդ եւ ամբողջական ընթերցումը:
Լուիզա ՍՈՒՔԻԱՍՅԱՆ
