ԱԺ-ում արտահերթ հատուկ նիստ է հրավիրվել՝ քննարկելու կառավարության կողմից ներկայացված «ՀՀ Քրեական օրենսգրքում» լրացում կատարելու մասին եւ «Վարչական իրավախախտումների վերաբերյալ» օրենսգրքում լրացում կատարելու մասին օրենսդրական նախաձեռնությունների փաթեթը: Այն նախատեսում է, որ եթե անձը ինքնամեկուսացման պահանջները խախտեց, նվազագույն աշխատավարձի 300-ապատիկից մինչեւ 500-ապատիկի չափով կտուգանվի: Եթե ֆիզիկական անձինք տեղեկություններ հրապարակեն, որոնք խուճապ կառաջացնեն, ըստ իրենց գնահատման, կտուգանվեն նվազագույն աշխատավարձի 50-ապատիկից մինչեւ 300-ապատիկի չափով: Քրեական օրենսգրքում էլ նախատեսում են, որ արտակարգ դրության ժամանակ ինքնամեկուսացման կամ մեկուսացման պահանջները խախտելը, որը անզգուշությամբ առաջացրել է մարդկանց զանգվածային հիվանդացում, պատժվում է կալանքով մինչեւ 3 ամիս ժամկետով կամ ազատազրկմամբ առավելագույնը 5 տարի ժամկետով:
ԱԺ նախագահ Արարատ Միրզոյանը հարցրեց. «Ինչպիսի՞ տեսք պետք է ունենա ինքնամեկուսացման պահանջը, արդյոք հորդորը՝ ով ջերմություն ունի՝ ինքնամեկուսանա, այդպիսի պահա՞նջ է: Տարընթերցումների տեղիք պետք է չլինի»:
Արդարադատության փոխնախարար Վահե Դանիելյանը պատասխանեց, որ ինքնամեկուսացման պահանջը իրավասու մարմնի կողմից պետք է լինի, պետք է ռեժիմ լինի տնից դուրս չգալը. «Եթե որեւէ համայնքում անձին ինքնամեկուսացման ցուցում է եղել, ռեժիմ է սահմանված, այդ ռեժիմը խախտելու դեպքում, եթե մարդիկ իրենց բնակության կամ ինքնամեկուսացման վայրը փոխեն, կենթարկվեն պատասխանատվության: Նպատակն է համաճարակը կանխելը, ոչ թե համատարած մեր քաղաքացիներին տուգանելը, պատժելը»:
Արարատ Միրզոյանը հարցրեց՝ գրավո՞ր պիտի լինի ինքնամեկուսացման պահանջը, պարետը ինքնամեկուսացման որոշո՞ւմ է կայացնում՝ փոխնախարարը պատասխանեց, որ մանրամասները պարետը կսահմանի՝ ցուցմամբ: Այս պահին դրանք սահմանված չեն. «Ըստ անհրաժեշտության՝ դրանք պարետի որոշմամբ կարող են լինել՝ մանրամասնությամբ»:
Կարդացեք նաև
Հռիփսիմե ՋԵԲԵՋՅԱՆ
