Ադրբեջանի նախագահ Իլհամ Ալիևը Նովրուզի առիթով դիմել է քաղաքացիներին և չի բացառել, որ երկրում առաջիկա ժամանակներս կարող է արտակարգ դրություն սահմանվել կորոնավիրուսի պատճառով:
«Նախապես ուզում եմ զգուշացնել, որ խիստ միջոցներ են ձեռնարկվելու, քանի որ սա ազգային հարց է, մեր ժողովրդի առողջության, մեր պետության անվտանգության հարցն է… Բացահայտ սադրանք ենք տեսնում, որը գալիս է հինգերորդ շարասյունից, մեր շրջանում գտնվող թշնամիներից, որոնք իրենց հռչակել են ընդդիմություն, դավաճաններից, որոնք գումար են ստանում արտասահմանից: Նրանց գլխավոր նպատակն է ոչնչացնել Ադրբեջանը: Նրանք ցանկանում են, որ խուճապ լինի, անկարգություններ»,-հայտարարել է Ալիևը:
Նա չի բացառել, «ինչ-որ պահի կարող է և արտակարգ դրություն սահմանվել և այս դեպքում հինգերորդ շարասյան ներկայացուցիչների մեկուսացումը կդառնա պատմական անհրաժեշտություն»։
Ադրբեջանի նախագահի հայտարարությանը հակադարձել է ադրբեջանական ընդդիմությունը: «Աշխարհի առաջնորդներն իրենց հայտարարություններով հանրությանը համախմբելու դրական կոչեր են անում, սակայն Իլհամ Ալիևը որոշել է սպառնալ և ներքին թշնամիներ, հինգերորդ շարասյուն փնտրել»,- ասել է ընդդիմադիր «Մուսավաթ» կուսակցության ղեկավար Արիֆ Հաջըլին:
Կարդացեք նաև
Նրա խոսքով՝ ժողովրդի թշնամիներին պետք է փնտրել իշխանության վերին էշելոններում, նրանք, ովքեր Ադրբեջանում ներկայացնում են Ռուսաստանի շահերը:
Ժողովրդական ճակատի փոխնախագահ Սեյմուր Խազին նույնպես քննադատել է Ալիևի հայտարարությունը:
«Մենք ժողովրդին կոչ ենք անում խուճապի չմատնվել, խուսափել անկարգություններից, այստեղ ի՞նչ վատ բան կա: Պարզապես իշխանությունը ցանկանում է օգտագործել իրավիճակը ընդդիմադիրներին մեկուսացնելու համար», – ասել է Խազին:
Ալիևի հայտարարությանն անդրադարձել է նաև Ադրբեջանում ԱՄՆ նախկին դեսպան Ռիչարդ Կոզլարիչը: «Տխուր է, որ Իլհամ Ալիևի տեղական և միջազգային մասշտաբով ճգնաժամն օգտագործում է ընդդիմության վրա հարձակվելու համար՝ օգտագործելով անցյալի բառապաշար»,-գրել է նա:
Պատրաստեց՝ Վիկտորյա ԱՆԴՐԵԱՍՅԱՆԸ
