«Քննարկումների արդյունքում մենք որոշեցինք, որ ձեռնպահ ենք մնում տնտեսվարողներին հարկային արտոնություններ եւ հարկային արձակուրդ տրամադրելու տեսքով աջակցություն ցուցաբերելուց: Դա վերաբերում է նաեւ ՓՄՁ-ներին: Որոշեցինք, որ կառավարությունը կտա հասցեական օժանդակություններ, շատ դեպքերում՝ բանկային համակարգի ներդրմամբ, որոշ դեպքերում՝ ուղղակի»,-կառավարության մամուլի կենտրոնում լրագրողների հետ հանդիպմանն այսօր անդրադառնալով հարցին, թե պետությունն ինչ միջոցներով է այս շրջանում օժանդակելու տնտեսվարողներին՝ հայտարարեց ՀՀ պետական եկամուտների կոմիտեի նախագահ Դավիթ Անանյանը:
«Մոտ երկու օրից կկարողանանք օժանդակության հստակ ձեւն առաջարկել տնտեսվարողներին: Որքան շուտ, այնքան լավ: ՓՄՁ-ների համար եւս կլինեն օժանդակության ծրագրեր, որոնք նույնպես չեն ենթադրում հարկային արձակուրդներ եւ արտոնություններ»,-նշեց Դավիթ Անանյանը:
Լրագրողները հետաքրրքվեցին՝ «հնարավո՞ր է, որ կորոնավիրուսի տարածմամբ պայմանավորված՝ հարկային եկամուտների թերակատարում լինի»:
Անանյանը պատասխանեց. «Ինչպես վարչապետն է նշել, երեկվա աշխարհը գոյություն չունի: Համաշխարհային տնտեսությունում վերափոխումներ են լինելու, ուստի ՀՀ-ում եւս հարկային եկամուտների թերակատարում ունենալու ենք: Որքա՞ն, չեմ կարող ասել: Ամեն ինչ անում ենք, որ հարկ վճարողների հետ լավ հարաբերությունները պահպանվեն: Մենք պատրաստ ենք բոլոր զարգացումներին»:
Կարդացեք նաև
Լուիզա ՍՈՒՔԻԱՍՅԱՆ
