«Պետական գնումների համակարգում կարևոր է թափանցիկությունը, որովհետև ավելորդ և անիմաստ ծախսերի հնարավորությունները բազմաթիվ են: Մասնավոր հատվածի գնումները չպիտի կատարվեն մեկ կամ երկու ընկերությունից, որպեսզի բիզնեսի բնագավառում ապահովենք փոքր և միջին բիզնեսի մրցունակությունը»,- այսօր ուղիղ եթերի ժամանակ ասաց Արցախի Ազգային ժողովի նախագահ, նախագահի թեկնածու Աշոտ Ղուլյանը:
«Արցախի ժողովրդավարական» կուսակցության ղեկավար Աշոտ Ղուլյանը, ելնելով երկրում ստեղծված իրավիճակից և խուսափելով հանրային վայրում բաց միջոցառում անցկացնելուց, ուղիղ եթերով հանդես եկավ և ներկայացրեց ապագայի խնդիրները և իր նպատակները:
Կառավարական համակարգում փոփոխությունների և նոր գաղափարների մասին խոսելիս՝ Աշոտ Ղուլյանը ասաց. «Մենք ներդնելու ենք մերիտոկրատական համակարգը, որը իրենից ենթադրում է արժանիքների վրա հիմնված առաջխաղացման սկզբունքը՝ հանրային ու քաղաքացիական ծառայություն մեջ, որի հետևանքով պետական պաշտոնները տրվելու են լավագույներին»:
Ըստ նրա, անպայման պետք է բեռնաթափել պետական գերծանրաբեռնված համակարգը. «Պետք է նախարարություններում և գերատեսչություններում բացառենք գործառույթների և ոլորտների կրկնությունը, որը հնարավոր է, որ կբերի հաստիքներ կրճատմանը: Այստեղ կարևոր է մասնավոր հատվածի հետ համագործակցելը, որպեսզի պետական կառավարման համակարգի լավագույն մասնագետները առանց աշխատանքի չմնան և կարողանան մասնավոր հատվածում իրենց գիտելիքները և կարողությունները կիրառել»:
Կարդացեք նաև
«Հանրային ծառայության բնագավառում պետք է փորձել զերծ մնալ բյուրոկրատական ընթացակարգերից: Պետական կառավարման համակարգում պետք է կիրառել մեկ պատուհանի սկզբունքը, առցանց դիմում-բողոքների քննարկումը: Դրա նպատակահարմարությունը ապացուցվել է բազմաթիվ երկրներում: Պետք է քաղաքացիների համար հեշտացնենք պետական համակարգի հետ շփումը»,- նշեց նա` հավելելով, որ առաջիկա օրերին իր գործընկերների և քաղաքական թիմի հետ կանդրադառնա մնացած դրույթներին:
Նոնա ՂԱԶԱՐՅԱՆ
