ՀՀ-ում հաստատված արտակարգ դրության պարետատանն առաջարկվել է որոշում կայացնել՝ ինքնամեկուսացման ցուցում ստացած անձանց կողմից ցուցումը խախտելու դեպքերի վերաբերյալ: Այս մասին այսօր կառավարության մամուլի կենտրոնում լրագրողների հետ հանդիպմանը հայտարարեց ՀՀ Առողջապահական և աշխատանքի տեսչական մարմնի ղեկավար Հակոբ Ավագյանը:
Նրա փոխանցմամբ. «Պարետատունն այս պահին աշխատում է այդ նախագծի վրա, առաջիկա ժամերին կընդունվի: Եթե անձը սահմանային հսկիչ կետում (ցամաքային, օդային) ծանուցվում է, որ պետք է ինքնամեկուսացվի, բայց խախտում է, այդ տեղեկատվությունը գնում է ոչ միայն առողջապահության նախարարություն, այլեւ ոստիկանություն: Այդ օրենսդրական փաթեթի լինելուց հետո, եթե ծանուցվածը խախտում անի, կենթարկվի վարչական պատասխանատվության: Տարածքային ոստիկաններն էլ վերահսկելու են ծանուցված անձի ինքնամեկուսացման պահպանումը»:
Լուիզա ՍՈՒՔԻԱՍՅԱՆ
