ՀՀ առողջապահության նախարար Արսեն Թորոսյանը մարտի 17-ին ֆեյսբուքյան էջում հրապարակեց առաջին ատյանի դատարանի դատավոր Ս. Երիցյանի վճիռը, որով դատարանն իրեն պարտավորեցրել է «Սուրբ Գրիգոր Լուսավորիչ» ԲԿ նախկին տնօրեն Արա Մինասյանից հրապարակային ներողություն խնդրել եւ հերքում տարածել՝ որոշակի արտահայտությունների համար:
Արսեն Թորոսյանը հիշեցրեց գործի նախապատմությունը. «Երբ 2018թ.-ի հուլիսի վերջին աշխատանքից ազատեցի Արա Մինասյանին, նա ինձ դատի տվեց՝ պահանջելով ներողություն խնդրել իմ արտահայտության համար, քանի որ դա զրպարտություն եւ վիրավորանք է համարում»:
https://www.facebook.com/ATorosyanOfficial/videos/600071250855450/?__xts__[0]=68.ARAuRZOM19qVDy37U0jU56IIbsEVBrO5DHMQfq3YcdONgwQyfVO1WmEOv3uPr-HQ5I7wfOiVIM0isJc17qdHazMXw0omdDyamacgiZEd0tuqpLTynQH2tt8jN-PXAizs76TXY3Nx5vsEHXzrNCRl6HWoW88SC41RAyslFpOCV-Ove6KcpJHVifGR3MpF0c9672G5SMXlJxCJBC_4FdpWaUo8gQv3u9vBIIL3BHbIoZtD4Ol4VeB1fCBhCT4MUUwpnwb0jB55p0BN5sCPcUcQpqiEgWCJJ36aYdWAwNujTrS0PCZAeAFYXqwvXuwgdWleKNzfhU_67KkH7vqibFW2lfcPi2q6iufugp8&__tn__=-R
Կարդացեք նաև
Հիշեցնենք, որ 2019թ.-ին դատարանն Արսեն Թորոսյանին պարտավորեցրել է ուղիղ եթերով ներողություն խնդրել «Սուրբ Գրիգոր Լուսավորիչ» ԲԿ նախկին տնօրեն Արա Մինասյանից, Արա Մինասյանը դատական հայցով նրանից պահանջում էր հերքել եւ ներողություն խնդրել հետեւյալ հրապարակային արտահայտությունների համար.
-«կազմակերպված խմբակային հանցավորություն է, ոչ թե սովորական»,
-«ու էդ կազմակերպված հանցավորության բանդայի մի մասը հիմա ցույց է անում, որ բանդայի պարագլուխը չզրկվի իր աթոռից»,
-«Էս հիվանդանոցի հարցը Հայաստանի առողջապահական համակարգի հարցն է, քանի որ այն միշտ վիշապի նման նստած է եղել Հայաստանի առողջապահության աղբյուրի վրա, վիշապը պետք է գլխատվի»:
Այս գործով Արսեն Թորոսյանի պաշտպանի վերաքննիչ բողոքները մերժվել էին: Արա Մինասյանը հետախուզման մեջ է:
Արսեն Թորոսյանը նշեց. «Դատարանի վճիռը հրապարակում եմ եւ վերահաստատում այն, ինչ ասել եմ այն ժամանակ: Նորից կհայտարարեմ, որ մեր դատական համակարգը չի վայելում ՀՀ ժողովրդի մեծամասնության վստահությունը եւ կարիք ունի արմատական բարեփոխումների: Կարծում եմ՝ այս «հաղթանակը» շատ չի ուրախացնի մեր նախկին գործընկերոջը: Նրան խնդրում եմ վերադառնալ ՀՀ եւ պատասխանել քննչական մարմնի հարցերին, այլապես ստացվում է, որ ես պետք է ներողություն խնդրեմ մի բանի համար, որը կարծես թե չի եղել: Այսինքն, պետք է ասեմ, թե չարաշահումներ չեն եղել այդ ԲԿ-ում: Այդ անձը թաքնվում է քննչական մարմիններից»:
Արսեն Թորոսյանը հավելեց. «Դատական համակարգը շարունակում է մնալ այն վիճակում, որում եղել է մինչեւ հեղափոխությունը»:
Նշենք, որ Վահագն Գրիգորյանը, որը հայցի քննության ընթացքում որպես փաստաբան դատարանում ներկայացրել է Արա Մինասյանի շահերը, իր «ֆեյսբուքյան» էջում նման գրառում է արել.
-«Ի՞նչ է անում արժանապատիվ և օրինապահ քաղաքացին, երբ դատարանում գործ է «պարտվում»։ Իհարկե, կատարում է իր դեմ կայացված դատական ակտը։
– Նույն իրավիճակում ի՞նչ է անում նախարար Արսեն Թորոսյանը։ Իհարկե, մտնում է «լայվ» ու հայտարարում, որ դատական ակտը չի կատարելու, քանի որ դատական համակարգը «վստահություն չի վայելում»։
– Նախարարը չի պատկերացնում, որ նման հայտարարությունը շատերի համար կարող է վարակիչ լինել։ Դատական գործը գրեթե միշտ ունենում է պարտվող կողմ։ Պարտվող կողմը գրեթե միշտ դժգոհ է մնում դատական ակտից և ունենում է անարդարության զգացում։ Ու ի՞նչ։ Բոլորը հետևեն նախարարի օրինակի՞ն։
– Նախարարը երևի չի խորհրդակցել որևէ իրավաբանի հետ՝ նախքան այսօրվա «լայվ» մտնելը։ Իսկ եթե խորհրդակցել է, ապա անկեղծորեն ցավում եմ՝ նման խորհրդատու ունենալու համար։
– Նախարարը չի գիտակցում, որ դատական համակարգի «վատ համբավը» պայմանավորված է ոչ միայն համակարգում առկա խնդիրներով, այլև՝ իրավական գիտելիքներ չունեցող մարդկանց և ոչ այնքան բարեխիղճ փաստաբանների կողմից արվող անհիմն, բայց սրտաճմլիկ հայտարարություններով։ Ցավում եմ, որ նախարարը այսօր «ջուր լցրեց նրանց ջրաղացին»։
– Նախարարը չի պատկերացնում, որ դատական համակարգը խաղալիք չի։ Չի կարելի դատական համակարգի նկատմամբ ունենալ էտ աստիճանի արհամարհական վերաբերմունք ու հետը «կռիվ-կռիվ» խաղալ։
– Նախարարը չգիտի, թե պետության համար ինչ հետևանքներ կարող է ունենալ անկատար մնացած դատական ակտը։
– Նախարարին մաղթում եմ առողջություն և շուտափույթ քրեական պատասխանատվություն՝ ՀՀ քրեական օրենսգրքի 353-րդ հոդվածով («Դատական ակտը դիտավորությամբ չկատարելը»):
P.S. Խոսքը ԵԴ/17717/02/18 դատական գործի մասին է (հայցվոր Արա Մինասյան ընդդեմ պատասխանողներ Արսեն Թորոսյան և ՀՀ առողջապահության նախարարություն), որտեղ ես ներկայացրել եմ հայցվորի շահերը»:
Լուիզա ՍՈՒՔԻԱՍՅԱՆ
