Հեռահաղորդակցության ոլորտում՝ ինտերնետ եւ բջջային կապի ծառայության ոլորտում խնդիրներ չկան, բայց օպերատորների՝ սպասարկման գրասենյակների թիվը սահմանափակվել է: Այսօր այս մասին հայկական միասնական տեղեկատվական կենտրոնում ասաց բարձր տեխնոլոգիական արդյունաբերության նախարար Հակոբ Արշակյանը՝ ներկայացնելով ոլորտի իրավիճակը կապված կորոնավիրուսով պայմանավորված երկրում սահմանված արտակարգ դրության հետ:
Նախարարն ասաց, որ հեռահաղորդակցության ոլորտի բավականին շատ աշխատակիցներ ու ընկերություններ անցել են առցանց աշխատանքի ռեժիմին՝ սահմանափակելով ֆիզիկական շփումները: Ոլորտի խոշոր ընկերությունների ներկայացուցիչների հետ հանդիպման ժամանակ, վերջիններս նախարարին հավաստիացրել են՝ տեխնիկական սպասարկման եւ հեռահաղորդակցության ապահովման՝ ինտերնետի ու բջջային ծառայությունների տեսանկյունից խնդիր չունեն.«Տեխնիկական խոցելի օղակները, որտեղ հնարավոր են որոշակի ռիսկեր, ամբողջությամբ բացահայտված են եւ մասնագետների փոխարինելիության խնդիրը լուծված է: Սպասարկման կենտրոններում որոշակի սահմանափակումներ են գործում, կենտրոնական հատվածներում գրասենյակների թիվը սահմանափակված է եւ աշխատակիցների եւ բնակչության շրջանում կորոնավիրուսի տարածմանը չնպաստելու համար:
Բոլոր օպերատորներն ունեն առցանց վճարումների հնարավորություն»:
Փոստային ծառայություններին՝ սոցիալական վճարների ու կենսաթոշակների վճարումներին անդրադառնալով նախարարն ասաց՝ քանի որ դրանք կատարվում են փոստերում, ապա որեւէ ընդհատումներ ու խափանումներ չեն լինի, պարզապես բաժանմունքները կգործեն ըստ իրավիճակի.«Այս պահին ամբողջ ծավալով գործում են եւ ծառայություններ են մատուցում: Որոշակի գործիքակազմ է գործում՝ խնդրել ենք կուտակումներ չլինեն, դրանցից խուսափելու համար որոշ անհարմարություններ կլինեն՝ բաժանմունքներում գտնվողների թիվը սահմանափակվելու է, կատարվելու է ախտահանում օրվա ընթացքում: Այն դեպքերում, որտեղ հնարավոր է սոցվճարներն ու կենսաթոշակները հասցնել տուն, հիմնականում գյուղական համայնքներում՝ կարվի առավելագույնը»:
Կարդացեք նաև
Նելլի ԲԱԲԱՅԱՆ
