Վարչապետ Նիկոլ Փաշինյանն այսօր շրջեց մի շարք մթերային խանութներում՝ արձանագրելու իրավիճակը: Նա փաստեց, որ գնորդների կուտակումներ եւ սննդի պակաս չկան: «Լսել եմ, որ ոսպի գինն է բարձրացել»,-ասաց Փաշինյանը խանութի պատասխանատուին, նա էլ վստահեցրեց, որ նման բան չկա, ոսպը վաճառվում է նախկին գնով, իսկ սննդի առաքման հետ կապված խնդիրներ առհասարակ չկան: «ՀՀ-ում որեւէ ապրանքի պակաս չկա»,-ասաց վարչապետը: Մեկ այլ խանութում էլ վստահեցրին, որ ոսպի գինը նույնն է:
Այնուհետեւ Փաշինյանը մտավ մեղրի վաճառքի խանութ, որի վաճառողն ասաց, որ վերջին օրերին սպառումը շատացել է: «Փաստորեն, մեղրն օգնում է կորոնավիրուսին»,-կես կատակով փաստեց Նիկոլ Փաշինյանը:
Մեկ այլ մթերային խանութում իրավիճակն ավելի աշխույժ էր: «Ճգնաժամային գնում չի՝ երկու հաց, արեւածաղիկ եւ ամենապոպուլյալ զուգարանի թուղթը: Իմիջիալյոց, իմացանք, որ այն հայտնի նկարը (նկատի ունի մեծ քանակով զուգարանի թուղթ գնած կնոջ լուսանկարը) ՀՀ-ում չի արված»,-քաղաքացիներից մեկի գնումները տեսնելով՝ նշեց Նիկոլ Փաշինյանը:
Ապա Փաշինյանը մտավ մի դեղատուն, որի վաճառողն ասաց՝ երկու օր է, որ չունեն ալկոգել: «Սպիրտ, դիմակ էլ չունենք»,-հավելեց նա՝ շեշտելով, որ «Վիետնամական աստղիկն» էլ է վերջացել: Փաշինյանը զարմացավ՝ ասելով, որ սովետական միությունից մնացած հիշողություններ արթնացան:
Կարդացեք նաև
Բանջարեղենի-մրգի խանութներից մեկում էլ ասացին, որ սխտորը շատ է սպառվել: Մեկ ուրիշ դեղատանն էլ ասացին, որ սպիրտ ու ալկոգել այսօր արդեն չունեն, իսկ դիմակ կար:
Ուշագրավ է, որ կոսմետիկայի խանութներից մեկում դիմակ էր վաճառվում՝ 150 դրամով: Նիկոլ Փաշինյանն արձանագրեց՝ երեկ խանութներում գրանցված իրավիճակը, ըստ ամենայնի, կապված է այն փաստի հետ, որ մարդիկ կարծել են, թե պարետային ժամ էլ է հայտարարվելու, չեն կարողանալու տանից առհասարակ դուրս գալ, մինչդեռ պարետային ժամ հայտարարված չէ:
Հիշեցնենք, որ կորոնավիրուսի տարածումը կանխարգելելու նպատակով ՀՀ-ում մինչեւ ապրիլի 14-ը հայտարարված է արտակարգ դրություն:
Լուիզա ՍՈՒՔԻԱՍՅԱՆ
