Սահմանադրական կարգը տապալելու մեղադրանքով կալանքի տակ գտնվող ՀՀ երկրորդ նախագահ «Ռոբերտ Քոչարյանի եւ մյուսների» գործով նիստն այսօր հնարավոր է չկայանա: Այդ մասին, Aravot.am-ի հետ զրույցում ասաց Ռոբերտ Քոչարյանի պաշտպանական խմբի անդամ Հայկ Ալումյանը:
Պաշտպաններին տեղեկացրել են, որ դատավոր Աննա Դանիբեկյանը վատառողջ է եւ նիստը այսօր չի կայանալու: Սակայն Հայկ Ալումյանն ասաց, որ իրենք`պաշտպանական կողմը, այնուամենայնիվ, գնալու է դատարան. «Տեսնենք…»: Պաշտպանական թիմի հետագա քայլերը կհստակեցվեն ավելի ուշ:
Հիշեցնենք, որ Ռոբերտ Քոչարյանի պաշտպանական կողմը հայտարարել էր`այսօր կայանալիք նիստում ներկայացնելու է Ռոբերտ Քոչարյանին անձնական երաշխավորությամբ ազատ արձակելու միջնորդություն։
Ռոբերտ Քոչարյանի խափանման միջոց կալանքը անձնական երաշխավորությամբ փոխելու առաջարկով հանդես էին եկել նաեւ ՀՀ նախկին վարչապետեր Վազգեն Մանուկյանը, Խոսրով Հարությունյանը և Կարեն Կարապետյանը, ինչպես նաև Արցախի նախկին վարչապետ Անուշավան Դանիելյանը։
Կարդացեք նաև
Նախորդ շաբաթվա վերջում Ռոբերտ Քոչարյանն առողջական խնդիրների պատճառով տեղափոխվել էր «Նաիրի» ԲԿ, իսկ այնուհետև՝ «Էրեբունի» ԲԿ, որտեղ մինչ օրս շարունակում է ստանալ ստացիոնար բուժում։ Եթե բժշկական հստակ հակացուցում չլինի, այսօրվա նիստին կարճ ժամանակով ներկա կգտնվի նաեւ Ռոբերտ Քոչարյանը:
Հաշվի առնելով, որ անձի ազատության հարցը հրատապ է և անհետաձգելի, Հայկ Ալումյանն ասաց, որ փաստաբանական թիմը գտնում է, որ անձնական երաշխավորության միջնորդությունը պետք է քննարկվի հրատապության կարգով։
Նելլի ԳՐԻԳՈՐՅԱՆ
