Այսօր կառավարության արտահերթ նիստից հետո լրագրողների հետ ճեպազրույցում առողջապահության նախարար Արսեն Թորոսյանն ասաց՝ մինչեւ օրվա վերջ կորոնավիրուսի վարակվածության կասկածանքով մեկուսացված քաղաքացիների թիվը կարող է ավելանալ:
Ըստ նախարարի՝ նոր մեկուսացումներ են տեղի ունեցել երեկ երեկոյան հաստատված դեպքերի շփման շրջանում: Այլ նոր տվյալներ չկան, քանի որ, ինչպես Թորոսյանն ասաց, թեստերի արդյունքները պատրաստ չեն. «Բայց այս պահին ունենք 30 հաստատված դեպք, որից մեկը առողջացած է, և դուրս է գրվել, նրա օրգանիզմում վիրուս չի հայտնաբերվել: Միայն երկուսի մոտ է առկա թոքաբորբ, բայց որեւէ մեկի կյանքին վտանգ չի սպառնում: Մեկուսացվածների թիվը, հնարավոր է, որ մինչեւ օրվա վերջ հասնի 420-430-ի»:
Առողջապահության նախարարը նշեց, որ այս օրվա ընթացքում թեստավորվել են մոտ 20 հոգի, բայց հնարավոր է, որ նրանց թիվը ևս ավելանա, օրվա վերջում հասնելով 50-60-ի:
Նելլի ԲԱԲԱՅԱՆ
