«ՀՀ-Արցախ հարաբերությունները եղբայրական լինելու այլընտրանք չունեն: Մենք համարում ենք, որ ՀՀ-ում տեղի ունեցած փոփոխությունները պատմական անհրաժեշտություն էին»,-«ֆեյսբուքյան» ուղիղ միացմամբ այսօր անդրադառնալով օգտատերերից մեկի հարցին, թե ինչ գնահատական կհնչեցնի ՀՀ-ում տեղի ունեցած «թավշյա» հեղափոխության մասին, եւ թե ինչպիսին են ՀՀ-Արցախ այսօրվա հարաբերությունները, ասաց Արցախի ԱԳ նախարար, Արցախի նախագահի թեկնածու Մասիս Մայիլյանը:
Նրա խոսքով՝ ՀՀ-ում կատարվող բարեփոխումների պտուղներից պետք է օգտվեն նաեւ Արցախի քաղաքացիները՝ արցախաբնակ հայերը. «Արցախ-ՀՀ հարաբերությունները պետք է զարգանան: Այսօրվա հարաբերությունները բնութագրում եմ ԱԳ նախարարությունների օրինակով: Այդ հարաբերություններն ինստիտուցիոնալ են, մեր բոլոր ստորաբաժանումները լավ գործակցում են տարբեր մակարդակներով: Երկու նախարարներով ընկերներ ենք, մտերիմ ենք նաեւ ընտանիքներով: Այս մոդելը պետք է կիրառենք նաեւ Արցախ-ՀՀ հարաբերություններում՝ այս ընտրություններում հաղթելուց հետո: Այստեղ որեւէ խնդիր չի կարող լինել, որովհետեւ մենք հասկանում ենք, որ վերջին հաշվով մենք մի երկիր ենք, մի Հայաստան, բայց հիմա գործում ենք որպես երկու հայկական պետություններ, եւ մենք ունենք ընդհանուր ճակատագիր, ապագա, եւ ինտեգրման ճանապարհով պետք է առաջ գնանք»:
Լուիզա ՍՈՒՔԻԱՍՅԱՆ
