Շիրակի մարզպետ Տիգրան Պետրոսյանն այսօր ոլորտի պատասխանատուների հետ անցկացրել է խորհրդակցություն՝ կորոնավիրուսի դեմ կանխարգելիչ միջոցառումների կազմակերպման թեմայով, որի ընթացքում էլ մանրամասն քննարկվել են կորոնավիրուսի դեմ տարվող պայքարի միջոցառումներն ու բոլոր քայլերը։
Շիրակի մարզպետը լրագրողների հետ ճեպազրույցում հայտարարել է, որ մարզում իրավիճակը կայուն է, այս պահի դրությամբ լուրջ մտահոգության օջախներ չկան․ ընդհակառակը, ըստ Տիգրան Պետրոսյանի, այն մարդիկ, որոնք ռիսկային գոտուց են վերադարձած ու շարունակական ուշադրության կենտրոնում են, շուտով նրանց քանակը երեք անգամ կնվազի, քանի որ լրանում է հսկողության տակ գտնվելու ժամկետը։
«Մեր մարզում խուճապային տրամադրություններ չկան, մեր մարզում մտահոգություններ չկան, մեկ-երկու դեպքեր են, որոնք եղել են հանրային ուշադրության կենտրոնում, ամբողջությամբ բացառվել են։Մեկը կապված էր մանկահասակ երեխայի հետ, որի մոտ ինֆեկցիոն հիվանդություն է եղել շատ հստակ ֆիքսված։ Այս տեսանկյունից մենք խնդիր ունենք բոլոր մարմիններին, որոնք որոշակի գործառույթներ պիտի ունենան, երբ որ կարիք ունենանք, գործընթացներին իրենց ուղղակի և հստակ ֆոկուսային մասնակցությունն ունենան»,- ասել է մարզպետը։
Գյումրիում երեկ ակտիվ լուրեր էին շրջանառվում, որ դպրոցներից մեկում մի երեխայի մոտ է կասկածվում կորոնավիրուս, նա ինֆեկցիոն հիվանդանոցում է բուժում ստացել, ուղարկել են Երևան, կասկածներ կան նաև Շիրակի պետական համալսարանի երկու ուսանողների մոտ, մարզպետն ասաց, որ երեխան, ում մասին նշում են, մի քանի շաբաթ ունեցել է ախտանիշներ, տարբեր բժշկական հիմնավորումներ են տրվել, որոշվել է ստուգել, նաև կորոնավիրուսի թեստ անցնել, որը և տվել է բացասական պատասխան։
Կարդացեք նաև
Նա նաև նշել է, որ Մարալիկի Չինական թաղամասում, որտեղ ժամանակավոր բնակվում են հյուսիս-հարավ ճանապարհաշինության մեջ ընդգրկված չինացի շինարարները, ստուգումներ եղել են, ամեն ինչ նորմալ է, որևէ դեպք չի հայտնաբերվել։
Մարզպետը նաև նշել է, որ Գերմանիայի Մեմինգեն քաղաքից Գյումրի չվերթը հետաձգելու մասին որևէ քննարկում չկա, հույս է հայտնել, որ մինչև մարտի 26-ը լուրջ խնդիրներ չեն ունենա։
Ի դեպ, Տիգրան Պետրոսյանի հանձնարարությամբ սկսել են ախտահանիչ միջոցառումներ իրականացնել Շիրակի մարզի տրանսպորտում։
«Շիրակի մարզպետ Տիգրան Պետրոսյանի հանձնարարությամբ ախտահանիչ միջոցառումներ են իրականցվում Շիրակի մարզի ներմարզային և համայնքային կանոնավոր ուղևորափոխադրումներ իրականացնող կազմակերպությունների երթուղիներում շահագործվող տրանսպորտային միջոցներում։
Աշխատանքները կրելու են շարունակական բնույթ»,-գրված է մարզպետարանի պաշտոնական լրահոսում։
Մարզպետարանի ֆեյսբուքյան էջում տեղադրվել են նաև լուսանկարներ ախտահանիչ միջոցառումներից։
Նունե ԱՐԵՎՇԱՏՅԱՆ
Լուսանկարները՝ Շիրակի մարզպետարանի ֆեյսբուքյան էջի
