Արդեն մի քանի շաբաթ է՝ քույրս ունի սուր հազ և իրեն թույլ է զգում։ Երեկվա դեպքերի ֆոնին արդեն կասկած առաջացավ, թե կարո՞ղ է կորոնավիրուս լինել, քանի որ ախտանիշները համընկնում էին։
Քույրս երկրից դուրս չէր եկել, և մեր իմանալով՝ շփում չէր ունեցել վարակվածների հետ, բայց մինչ այս աշխատել էր սպասարկման ոլորտում, ինչը խորացնում էր մեր կասկածները, որ կարող էր ակամա շփված լիներ վարակվածների կամ վարակակիրների հետ։ Բացի այդ՝ նա ուսանող է, և հազը համալսարանում էլ էր կասկածի առիթ դարձել։
Որոշեցինք հետևել բժիշկների ցուցումներին և առավոտյան զանգահարեցինք Առողջապահության նախարարության թեժ գիծ՝ 8003։ Կես ժամ, մի քանի զանգ պահանջվեց մինչև մեզ պատասխանեցին։ Պատասխանը հետևյալն էր՝ ախտանշանները համապատասխանում են, խնդրում ենք դիմել պոլիկլինիկա. բոլոր պոլիկլինիկաները արդեն տեղեկացված են։
Բախտներս բերեց, որ մեր տեղամասային թերապևտը այսօր երկրորդ հերթով էր աշխատում։ Առանց հապաղելու պոլիկլինիկա գնացինք, հերթի մեջ 10 րոպե սպասելուց հետո թերապևտը մեզ ընդունեց և միանգամից ուղարկեց Շենգավիթ ԲԿ՝ կրծքավանդակի ռենտգենոգրաֆիայի։
Կարդացեք նաև
Բժշկական կենտրոնում իրավիճակը մի փոքր ավելի լուրջ էր, աշխատակազմը՝ ավելի զգոն։ Դռներին փակցված էր, որ այցելուների թիվը սահմանափակ է և գործում են մի շարք այլ սահմանափակումներ։ Աշխատակազմը հորդորեց չհետաձգել ստուգումները և նման ախտանիշների առկայության դեպքում անհապաղ անցնել բոլոր ստուգումները։
Ստուգումը և ախտորոշման պատասխանների ստացումը տևեց մոտավորապես կես ժամ՝ առանց որևէ հերթի, և արժեցավ 8000 դրամ։
Կրծավանդակի ռենտգենոգրաֆիայի պատասխանները բացասական էին. քույրս ամբողջովին առողջ է։ Բայց ամեն դեպքում բժիշկը խորհուրդ տվեց կրել դիմակ, ուտել իմունիտետը բարձրացնող սնունդ և պահպանել զգուշավորությունը։
Ամի ՉԻՉԱԿՅԱՆ
