Aravot.am-ը ԵՊՀ հումանիտար և հասարակագիտական մասնագիտությունների գծով պրոռեկտոր Էլինա Ասրիյանից հետաքրքրվեց, թե ինչու է որոշում կայացվել այլեւս կուրսային աշխատանքներ չհանձնարարել, ինչով էր դա պայմանավորված եւ նպատակահարմար:
«Միջազգային փորձի ուսումնասիրությունը, կրթական ծրագրերի մշտադիտարկումները, ինչպես նաև նախորդ ինստիտուցիոնալ հավատարմագրման ժամանակ ստացված փորձագետների խորհրդատվությունը հիմք հանդիսացան վերանայելու հետազոտական աշխատանք գաղափարը: Մենք արձանագրեցինք, որ կուրսային աշխատանքները հիմնականում չեն ծառայում ուսանողների մոտ հետազոտական հմտությունների ձևավորմանը:
Կարևորելով տվյալ հմտությունների զարգացումը՝ մենք 2019-2020 ուստարվանից պիլոտային ծրագիր սկսեցինք 2 ֆակուլտետներում: Պիլոտային ծրագրի նպատակն էր բակալավրի եւ մագիստրոսի կրթական ծրագրերի մասնագիտական դասընթացներում հետազոտական բաղադրիչ ներդնել: Նախաձեռնությանը միացան ևս չորս ֆակուլտետ, ինչը մեզ շատ ուրախացրեց: Կիսամյակի ավարտին, կատարվեց վերլուծություն, ինչի հիման վրա դուրս բերեցինք ծրագրի առավելությունները և թերությունները: Դրանք հաշվի առնելով՝ վերանայեցինք կարգը, որը և ներկայացված էր երեկ գիտխորհրդին: Արդյունքում մենք 2 կուրսային աշխատանքը կփոխարինենք 6 հետազոտական աշխատանքով, որոնք ընդգրկված կլինեն մասնագիտական դասընթացներում»,-ասաց պրոռեկտորը:
Հետաքրքրվեցինք նաեւ, թե ինչպես են լրացվելու բաց թողնված դասերը, նպատակահարմա՞ր չէ այս շրջանում ԵՊՀ-ում անցնել հեռավար ուսուցման եւ արդյոք նման հարց քննարկվե՞լ է կամ մտադի՞ր են քննարկել:
Կարդացեք նաև
«Դասերն անպայման լրացվելու են, և երկուշաբթի ռեկտորատի նիստին կորոշվի նոր ժամանակացույցը»,-պատասխանեց Էլինա Ասրիյանը: Նաեւ հավելեց. «ԵՊՀ-ում մի քանի տարի է, ինչ ներդրված է Մուդլ էլեկտրոնային համակարգը, որը հնարավորություն է տալիս հեռավար ուսուցում իրականացնել: Միայն նախորդ կիսամյակում 200 դասընթաց ներբեռնված է եղել վերոհիշյալ համակարգ և այդ թիվը աճելու է նաև այս կիսամյակում: Այնպես որ հեռավար ուսուցումը արդեն իսկ կիրառվում է որոշ ֆակուլտետներում»:
Գոհար ՀԱԿՈԲՅԱՆ
