Հայաստանում թագավարակի (կորոնավիրուսի) տարածման հետ կապված երեկվանից կրկին հանրային եւ քաղաքական շրջանակներում ակտիվացել են ապրիլի 5-ին կայանալիք հանրաքվեն չեղարկելու մասին խոսակցությունները:
Aravot.am-ը սահմանադրագետ Արամ Վարդեւանյանից հետաքրքրվեց`հանրաքվեն չեղարկելու իրավական որևէ ընթացակարգ գոյություն ունի՞: Մեր զրուցակիցն ասաց, որ հանրաքվեն հետաձգելու միակ իրավական մեխանիզմը արտակարգ դրությունն է, քանի որ արտակարգ դրության ժամանակ որեւէ նման հանրային միջոցառումների, այդ թվում` ընտրությունների կամ ընտրական իրավունքի հետ կապված գործողությունները, ինչպես սահմանում է Սահմանադրության 208 հոդվածը, որը վերաբերում է հանրաքվե անցկացնելու արգելքին, նախատեսում է, որ ռազմական կամ արտակարգ դրության ժամանակ հանրաքվեն չի անցկացվում:
«Արդյոք համաճարակը ինքնին կամ Առողջապահության համաշխարհային կազմակերպության կողմից արդեն պանդեմիա որակված վիրուսը բավարա՞ր կլինի արտակարգ դրություն հայտարարելու համար. սա, իհարկե, արդեն կարելի է ասել իշխանության կողմից կայացող որոշման տեսակներից է: Բայց ինքնին Սահմանադրությունը արգելում է` արտակարգ դրության ժամանակ հանրաքվեի անցկացումը»:
Հետաքրքրվեցինք, իսկ, եթե պարզապես իշխանությունում քաղաքական որոշում ընդունվի հանրաքվեն հետաձգելու մասին, դա կարո՞ղ է հիմնավոր լինել, թե դա նույնպես անօրինական, հակաիրավական կդիտվի: «Հանրաքվեի մասին սահմանադրական օրենքը, ըստ էության, մեխանիզմներ չի նախատեսվում, բայց մյուս կողմից, նման համաճարակային վիճակների, մեր հանրաքվեների կամ ընտրությունների անցկացման ժամանակահատվածներում, փորձ չի եղել: Հետևաբար այն, որ օրենքը նման մեխանիզմ չի նախատեսում, նաև, միգուցե դրա կանխատեսման կամ նման փորձի բացակայության արդյունքն է: Դա կարող է նաև հենց հրատապ կամ արտահերթ օրենսդրական փոփոխության առարկա հանդիսանալ: Հետևաբար, այստեղ, եթե նայում ենք ավելի կարճ` Սահմանադրությունը նախատեսում է արտակարգ դրության մեխանիզմ, որպես այդպիսին, հանրաքվեի չանցկացնելու հետ կապված: Բայց սա, իհարկե, կրկին իշխանությունների կողմից հնարավոր կայացվող որոշումներից մեկն է»:,- ասաց մեր զրուցակիցը`օրինակ բերելով, որ ԱՄՆ-ում արտակարգ դրություն հայտարարվեց, որոշ նահանգներում նույնիսկ շատ ինտենսիվ ռեժիմով. «Սա իշխանության գնահատման հարց է: Ես այդ առումով զուտ իրավական տեսանկյունից կարող եմ ասել`արտակարգ դրությունն ինքնին բացառում է հանրաքվեի անցկացումը: Իսկ հնարավոր հետաձգելու կամ նման այլ մանրամասները, դրանք բոլորը պետք է սահմանվեն օրենքով: Օրենքներում նման մանրակրկիտ կարգավորումներ չկան, բայց դրանք նաեւ օրենսդրական փոփոխությունների արդյունքում կարող են նաեւ քննարկման առարկա դառնալ»:
Կարդացեք նաև
Նելլի ԳՐԻԳՈՐՅԱՆ
