«Հելսինկյան նախաձեռնություն-92»-ի ԼՂՀ կոմիտեի համակարգող, արցախցի իրավապաշտպան Կարեն Օհանջանյանը ֆեյսբուքյան իր էջում գրել է. «Չգիտեմ, թե Հայաստանի և Արցախի իշխանություններն ինչ են մտածում կորոնավիրուսի տարածման մասին, բայց ակնհայտ է, որ վիրուսի կայծակնային տարածման պարագայում երկու կառավարությունների ձեռնարկած միջոցառումները բավարար չեն:
Առողջ և անվտանգ կյանքի ապահովման համար պատասխանատու անձանց ոչ կոմպետենտության և թեստերի բացակայության պարագայում, կոչ եմ անում մեր երկու պետությունների քաղաքացիներին ցուցաբերել բարձր ազգային գիտակցություն: Վատ զգալու, շնչառության հետ դժվարություններ ունենալու, ջերմության, մարմնում թուլության և ցավերի, չոր կամ այլ ձևի հազի դեպքում ինքնամեկուսացվել՝ նախօրոք ձեռք բերելով անհրաժեշտ դեղամիջոցները և ուսումնասիրելով վիրուսի դեմ պայքարելու միջոցները: Ակնհայտ է, որ հայկական առողջապահական համակարգը չի կարողանալու ադեկվատ ձևով պատասխանել վիրուսի ակտիվացմանը, ինչը վտանգ է սպառնում մեր շրջապատի մարդկանց կյանքերը խլելուն:
Դուք պետք է պատրաստ լինեք ամենատխուր արդյունքներին, բայց միաժամանակ չընկճվել, այլ դրսևորել բարձր գիտակցություն և հետևողական լինել Առողջապահության համաշխարհային կազմակերպության խորհուրդներին՝ դրանով իսկ մաքսիմալ նպաստելով կորոնավիրուսի տարածման նվազեցմանը:
Արցախի իշխանություններին կոչ եմ անում անմիջապես դադարեցնել ուսումնական գործընթացը երկրի մանկապարտեզներում, դպրոցներում և բարձրագույն ուսումնական հաստատություններում: Եթե իշխանությունը նման որոշում չընդունի, կոչ եմ անում ամբողջ բնակչությանը գործադուլ հայտարարել մանկապարտեզներում, դպրոցներում և բարձրագույն ուսումնական հաստատություններում և հրաժարվել մարդկանց զանգվածային հավաքույթներից: Դա անհրաժեշտ է ձեր և ձեր հարազատների կյանքի ապահովման համար:
