«Հուսով եմ, մեր պետական ինստիտուտները մշակված սցենարներ ունեն և գիտեն, թե ինչ գործողություններ պետք է ձեռնարկեն»,-ասաց Մարդկային զարգացման միջազգային կենտրոնի ղեկավար Թևան Պողոսյանը «Տեսակետ» մամուլի ակումբում ՝ անդրադառնալով Հայաստանում կորոնավիրուսի նոր դեպքերի հաստատմանը և դրա հետ կապված մեր անելիքներին:
Հիշեցնենք, որ երեկ՝ վարչապետ Նիկոլ Փաշինյանը հայտարարեց, որ կորոնավիրուսով վարակված ևս 3 քաղաքացիների կան, որոնք ժամանել են Իտալիայից: Այսպիսով, Հայաստանում կա 4 վարակված քաղաքացի:
«Մարդկային զարգացման միջազգային կենտրոնի» ղեկավար Թևան Պողոսյանն առաջարկում է փոխվարչապետի մակարդակով ստեղծել կենտրոնացված օպերատիվ շտաբ, որի միջոցով կկանոնակարգվի Կորոնավիրուսի հետ կապված յուրաքանչյուր տեղեկություն: Այսինքն՝ շտաբը պետք է պարբերաբար տեղեկություններ հաղորդի կորոնավիրուսի տարածման, իրականացվող կանխարգելիչ միջոցառումների մասին, որպեսզի հանրությունը ճիշտ տեղեկություններ ստանա մեկ աղբյուրից, այլ ոչ՝ տարբեր սոցկայքերից:
«Լավ կլիներ, որ տրանսպորտային միջոցներն ախտահանվեին, ինչպես նաև՝ մենք ինքներս հոգատար լինեինք ինչպես մեր, այնպես էլ՝ դիմացինի հանդեպ: Եթե զգում ենք, որ մի բան այն չի, գիտակցաբար գնանք և տեղեկացնենք, այլ ոչ թե ինչ-որ սիմպտոմի դեպքում, ասենք՝ ստից բան է, կանցնի»,-ասաց նա:
Կարդացեք նաև
Մանրամասն՝ տեսանյութում
Անդրադառնալով ապրիլի 5-ին կայանալիք հանրաքվեին, Թեւան Պողոսյանն ասաց. «Սա նույնպես անվտանգության հարց է, և պիտի ըստ իրավիճակի ճիշտ հաշվարկներ արվեն. չեղարկե՞լ հանրաքվեն, թե՞ այն կարող է տեղի ունենալ»:
«Այսօրվա դրությամբ՝ միգուցե եղած իրավիճակն այնպիսին է լինելու, որ այլ որոշում կայացվի՝ ելնելով ՀՀ անվտանգության խնդիրներից: Արդյոք սա՞ է առաջնայինը, թե՞ այլ խնդիրների վրա պիտի ուշադրություն դարձնել: Օրինակ, ԱՄՆ-ը 30 օրով փակում է սահմանը Եվրոպական միության և Չինաստանի հետ, մեկ այլ տեղում այլ բաներ են արվում: Դրա համար պիտի կառավարությանը կից շտաբ գործի, որ մենք էլ հասկանանք՝ գուցե իրավիճակն այնպիսին է, որ պետք չէ հանրաքվեի գործընթացը կանգնեցնել: Սակայն պետք է նաև գիտակցենք, որ անվտանգության տեսանկյունից հնարավոր է՝ կարիք լինի հանրաքվեն չեղարկելու կամ հետաձգելու: Պետք է լինեն հաշվարկված, փաստերի վրա հիմնված, ճիշտ սցենարներով պլանավորված որոշումներ, իսկ դրա համար պետք է տիրապետել տեղեկատվական ամբողջ հոսքին»,- նշեց նա:
Մանրամասն՝ տեսանյութում
Նոնա ՂԱԶԱՐՅԱՆ
