Առողջապահության նախարար Արսեն Թորոսյանն այսօր կառավարության նիստից հետո լրագրողների հետ ճեպազրույցում անդրադառնալով կորոնավիրուսի նոր հաստատված դեպքերին, ասաց՝ ինքնամեկուսացումն ու սոցիալական պատասխանատվությունը համաճարակները կանխարգելելու միակ գործիքն է. «Եթե վիրուսը տարածվում է նաեւ գաղտնի շրջանում, շատ արագ մենք չենք կարող մեկուսացնել հազարավոր քաղաքացիների: Նույնիսկ Չինաստանը, երբ գնաց մեկուսացման գործողություների, դրանք տնային հյուրանոցային մեկուսացումներ չէին, դրանք քաղաքների եւ նահանգների մեկուսացում էին, որպեսզի երկիրը չներգրավվի»:
Երեկ հաստատվեց կորոնավիրուսի 3 նոր դեպք, նրանք ժամանել են Իտալիայից: Թորոսյանն ասաց՝ վարակակիր այդ քաղաքացները Իտալիայից Հայաստան են ժամանել տարբեր օրերի, տարբեր չվերթներով, եւ ոչ ուղիղ Իտալիայից: Ըստ նախարարի, մեկը եկել է 10 օր առաջ, մյուսը՝ 2-3 օր առաջ, 3-րդը՝ մոտ 10 օր առաջ. «Սրանք տարբեր դեպքեր են. 10 օր առաջ վերադարձած քաղաքացու շփման շրջանակը պարզ է՝ քիչ մարդիկ են եւ բոլորը մեկուսացված են»:
Այս երեք վարակակիրները բացահայտվել են, ինչպես նախարարն ասաց, երբ գանգատ են ունեցել, դիմել են համապատասխան ծառայությանն ու թեստավորվել:
Վարակի օջախային երկրից՝ Իտալիայից ՀՀ ժամանած Էջմիածնի բնակիչը, որի մոտ հաստատվել է վարակը եւ նա հանրային մեծ միջոցառման է մասնակցել՝ ինքնամեկուսանալու փոխարեն, դեռ մարտի 7-ից ջերմել է: Թորոսյանն այս առնչությամբ ասաց. «Այո, մեր տնայցերի ժամանակ իրենք մի քիչ դիմադրություն են ցուցաբերել եւ ասել են՝ ջերմություն չունեն: Դրանից հետո ամբողջ շրջանակը պարզվել է»:
Կարդացեք նաև
Նախարարն ասաց, որ ինքնամեկուսացման պահանջին չենթարկվելու համար վարչական պատասխանատվություն կա, հիմա դա քննարկում են:
Թորոսյանը նորից կոչ արեց՝ այն քաղաքացիները, որոնք վերադարձել են վիրուսի օջախային երկրներից՝ սահմանափակեն իրենց շփումները, մեկուսանան, եւ եթե ունեն գանգատներ՝ ինքնաբուժմամբ չզբաղվեն, դիմեն համապատասխան մասնագետներին:
Նելլի ԲԱԲԱՅԱՆ
