2017 թվականի նոյեմբերին Հայաստանի նախորդ իշխանության կողմից ստորագրված ՀՀ-ԵՄ համապարփակ եւ ընդլայնված գործընկերության համաձայնագիրը, ըստ Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցի, կոչված էր լրացնելու այն ձախողումը, որն արձանագրվել էր 2013 սեպտեմբերի 3-ին, երբ Սերժ Սարգսյանը «մեկ գիշերվա ընթացքում մոսկովյան հանդիպումից հետո» հայտարարեց, որ Հայաստանը չի ստորագրելու Ասոցացման համաձայնագիրը, այլ ստորագրելու է Մաքսային միության պայմանագիրը: «Դա շոկ առաջացրեց»,- այսօր կազմակերպված միջոցառման ժամանակ ասաց Արթուր Սաքունցը` եւ հիշեցնելով նաեւ Ուկրաինայի դեպքերը, կարծիք հայտնեց, որ Ասոցացման համաձայնագրի դեմ սահմանափակող գործոն հանդիսացավ նաեւ երկրների ներքին ռեսուրսների ոչ բավարար լինելը: Նրա կարծիքով, սակայն, Ուկրաինան կարողացավ հաղթահարել այդ մարտահրավերը:
Հիշեցնենք, ՀՀ-ԵՄ համապարփակ եւ ընդլայնված գործընկերության համաձայնագրի իրականացման գործընթացի վերաբերյալ մշտադիտարկում կիրականացնեն քաղհասարակության կազմակերպությունները: Ծրագիրն իրականացնում է Բաց հասարակության հիմնադրամներ-Հայաստանը` Վրաստանում եւ Հայաստանում Նիդերլանդների թագավորության դեսպանության աջակցությամբ:
Սակայն միայն ստորագրելը, բանախոսի կարծիքով, ոչինչ չի նշանակում: Նա շատ կարեւոր է համարում բուն բարեփոխումների իրականացումը` ինստիտուտների հզորացմամբ: Արթուր Սաքունցը հիշեց ՀՀ-ում ԵՄ նախկին դեսպան Պյոտր Սվիտալսկու նախատինքը`«ԵՄ-ն բանկոմատ չէ» եւ ասաց, որ նախկին իշխանության մոտեցումը հենց այդ էր՝ փող՝ ոչնչի դիմաց: «Այն մարդիկ, որոնք այսօր շահագրգռված են, որ տապալվի համաձայնագրի իրականացումը, այն ժամանակ հանգիստ էին՝ լավ իմանալով, որ իշխանությունը տապալելու է։ Այսօր իշխանություն չունենալով` փորձում են փողոցային քաղաքականացված խուլիգանությամբ խոչընդոտել»։
Այլ մանրամասները`տեսանյութում:
Կարդացեք նաև
Նելլի ԳՐԻԳՈՐՅԱՆ
