Երևանի ընդհանուր իրավասության դատարանում (նախագահող դատավոր Դավիթ Բալայան) մարտի 11-ին տեղի ունեցավ լիազորությունները ժամանակավորապես կասեցված ՊՎԾ պետ Դավիթ Սանասարյանի և մյուսների գործով դատական նիստը։
Գործը գտնվում է ապացույցների հետազոտման փուլում։ Դատարանը շարունակում է հրապարակել գործում առկա գրավոր փաստաթղթերը։
Դավիթ Սանասարյանին մեղադրանք է առաջադրվել այն բանի համար, որ նա, հանդիսանալով ՀՀ պետական վերահսկողական ծառայության ղեկավար, ունենալով ծառայության անմիջական ղեկավարումն իրականացնելու, ծառայության աշխատակիցներին նշանակելու և ազատելու, կարգապահական տույժի ենթարկելու, վերահսկվող օբյեկտներում ուսումնասիրություններ իրականացնելու հանձնարարագրեր տալու, վերահսկվող օբյեկտներից ծառայության գործառույթներին առնչվող տեղեկություններ և փաստաթղթեր պահանջելու լիազորություններ, խմբային շահերից ելնելով, իր պաշտոնեական դիրքն օգտագործել է ծառայության շահերին հակառակ, ինչպես նաև չի կատարել իր ծառայողական պարտականությունները:
Դատարանի դահլիճում Դավիթ Սանասարյանը հայտարարեց՝ Սամվել Ադյանին աշխատանքի ընդունելուց առաջ հարցրել է՝ զբաղվում է բիզնես գործունեությամբ, թե ոչ։ Նա այս առիթով մանրամասնեց․ «Սամվել Ադյանին աշխատանքի ընդունելուց առաջ հարցրել եմ՝ որևէ բիզնես գործունեությամբ զբաղվում է, թե ոչ։ Ինձ պատասխանել է, որ չի զբաղվում։ Ասել է, որ ընտանիքն ունի բիզնես, բայց ինքը չի զբաղվում»։
Կարդացեք նաև
Դավիթ Սանասարյանը նաև վստահեցրեց, որ որևէ տեղեկություն չի ունեցել նաև, որ «Զորաշեն» ՍՊԸ-ն պատկանել է Սամվել Ադյանին։ Նա հայտարարեց․ «Ես որևէ տեղեկություն չեմ ունեցել, որ Զորաշեն ՍՊԸ-ն պատկանել է Սամվել Ադյանին, քրեական գործով եմ ծանոթացել, որ Մեդ էքսպերտ ՍՊն-ն պատկանում է Գևորգ Խաչատրյանին, այլապես ես նրանց աշխատանքի չէի ընդունի»։
Տաթև ՀԱՐՈՒԹՅՈՒՆՅԱՆ
