«Քարոզարշավի առաջին քառորդը անցավ, բայց «Ժառանգություն» կուսակցության տեսակետում ոչինչ չի փոխվել, մենք դեռ այն կարծիքն ենք, որ ապրիլի 5-ը նոր Հայաստանի ընտրության օրը չէ»,- «Հենարան» մամուլի ակումբում ասաց «Ժառանգություն» կուսակցության նախագահ Անդրանիկ Գրիգորյանը՝ անդրադառնալով Սահմանադրական բարեփոխումների հանրաքվեին:
Հանրաքվեով իշխող ուժն առաջարկում է դադարեցնել Սահմանադրական դատարանի նախագահ Հրայր Թովմասյանի և ՍԴ 6 դատավորի լիազորությունները։ Հանրաքվեի քարոզչական շրջանում ձևավորվել է երկու շտաբ՝ «Այո» և «Ոչ»:
«Մենք չենք ընդունում հատվածական փոփոխությունները, բայց Հայաստանում դատաիրավական համակարգի ճգնաժամի առկայության դեպքում որոշակի օղակներում փոփոխություններ կատարելը, որպես քաղաքական նպատակ, արդարացի է: Իշխող ուժը գնում է այդ հատվածական փոփոխությանը, սակայն, այստեղ խնդիրը այն է, որ այս հատվածականությունը բերելու է նոր ճգնաժամերի հաջորդ փուլում»,- ասաց Անդրանիկ Գրիգորյանը:
Ըստ Գրիգորյանի, հանրաքվեի քարոզարշավից մենք չենք ստանում մի շարք հարցերի պատասխաններ. «Օրինակ՝ ինչո՞վ էին Սահմանադրական դատարանի, իրենց բնորոշմամբ, ապօրինի ընտրված, դատավորները խանգարում իշխանությանը, որպեսզի կատարեն բարեփոխումներ և արդյոք Սահմանադրության հենց այդ մի կե՞տն է խանգարում գործող իշխանությանը իրենց փոփոխությունները կյանքի կոչելու համար»:
Կարդացեք նաև
«Այո»-ի հաղթանակի և «Ոչ»-ի պարտության դեպքում վստահաբար իշխող քաղաքական թիմի սանձարձակությունը կմեծանա, իսկ «Ոչ»-ի հաղթանակի դեպքում նախկինների ռևանշի հնարավորությունը կմեծանա։ Երկուսն էլ վտանգավոր ճանապարհ են»,- նշեց Անդրանիկ Գրիգորյանը։
«Հերթական անգամ իշխանությունը շահարկում է հեղափոխության խաղաքարտը, և բովանդակային քննարկումներից դուրս՝ նրանք օգտագործում են Նիկոլ Փաշինյանի հեղափոխության մեջ ունեցած դերը, որպեսզի հասնեն իրենց նպատակին: Իրենց միակ նպատակը Սահմանադրական դատարանի դատավորների փոփոխությունն է, որը մի գուցե քաղաքականապես արդարացված է, բայց դա այն չէ, ինչը, որ պետք է մեր պետությանը»,- ասաց կուսակցության նախագահը:
Խոսելով Արցախի Հանրապետությունում կայանալիք նախագահական ընտրություններից՝ Գրիգորյանը նշեց, որ Արցախը վտանգավոր տարածաշրջան է հեղափոխական զարգացումների համար։
«Կարծում եմ, Արցախի բնակչությունն անցած տարիներին իր դրսևորած կամքի արդյունքում վաստակել է ինքնուրույն սեփական ճակատագիրը որոշելու հնարավորություն։ Եվ եթե մենք դա կարողացանք պարտադրել մեր չակերտավոր հարևանին և ցույց տալ, ի վերջո, որ Լեռնային Ղարաբաղի բնակչությունը պետք է որոշի իր հետագա ճակատագիրը, պետք է հայաստանյան բոլոր իշխանություններն էլ հաշվի նստեն այս իմպերատիվ իրողության հետ»,- ընդգծեց «Ժառանգության» նախագահը։
Նոնա ՂԱԶԱՐՅԱՆ
