«Մենք այս հանրաքվեն համարում ենք անօրինական»,- «Փաստարկ» մամուլի ակումբում լրագրողների հետ հանդիպմանը հայտարարեց Բոյկոտ նախաձեռնության շտաբի կազմակերպիչ Վահագն Չախալյանը՝ անդրադառնալով սահմանադրական հանրաքվեի անցկացմանը:
Նա նշեց, որ իրենց շտաբն անվանել են «Բոյկոտի և համերաշխության» հաստատման շտաբ և մանրամասնելով ասաց. «Պատճառներից մեկն այն է, որ հանրության մեջ եղած պառակտումը՝ սևերի և սպիտակների, մեզ համար անընդունելի է և չի բխում մեր երկրի, պետականության շահերից: Մենք դա համարում ենք ծուղակ մեր պետականության համար»:
Նա վստահեցրեց՝ քարոզելու են, որ հանրաքվեն սխալ է, մերը չէ, և մենք պետք է համերաշխ լինենք:
Վահագն Չախալյանը տեղեկացրեց՝ ապրիլի 2-ին հայտարարելու են ազգային միասնության, համերաշխության օր և կոչ արեց բոլոր քաղաքական ուժերին միանալ, միասին քայլերթ կազմակերպել դեպի Եռաբլուր՝ Ազատության հրապարակից՝ ժամը 12-ին և այնտեղից շարժվել Սուրբ Էջմիածին:
Կարդացեք նաև
Ըստ նրա, երբ իշխանությունը օրենք է խախտում, թեկուզ մեկ անգամ, ապա երկիրը դատապարտված է հակաօրինականության. «Հիշենք Լևոն Տեր-Պետրոսյանի կողմից կեղծված 1996-ի նախագահական ընտրությունները: Մինչ օրս ապրում ենք դրա հետևանքները, և երկիրը խելքի չի գալիս: Այս հանրաքվեն էլ մեծ վտանգ է պարունակում և երկիրը մտցնում է մի շրջափուլ, որից չգիտենք՝ դուրս կգա՞նք, թե՝ ոչ: Այս հանրաքվեն մեծ սպառնալիք է»:
Ըստ Վահագն Չախալյանի՝ ժողովրդավարության հաստատման հեղափոխությանը վերջ կդնի հանրաքվեն: Ըստ նրա՝ այն լեգիտիմությունը, որ ունեն այսօրվա իշխանությունները, հանրաքվեով վերջ կդրվի այդ լեգիտիմությանը: Վահագն Չախալյանի կարծիքով՝ անհասկանալի է, թե իշխանությունն ինչու է գնում դեպի այս ծուղակ»:
Շտաբի ներկայացուցիչ Հմայակ Մկրտչյանը նշեց, որ իրենց համար այս հանրաքվեն անօրինական է և կոչ արեց իշխանություններին օր առաջ հրաժարվել: Այնուհետև նշեց. «Մենք ոչ «ոչ»-ի, ոչ էլ «այո»-ի կողմնակից ենք:
Մենք ասում ենք, որ հանրաքվեն պետք է բոյկոտվի, քանի որ Սահմանադրությունը ենթադրում է, որ այս հարցը կարող էր հանրաքվեի դրվել միայն այն դեպքում, երբ ՍԴ դրական եզրակացությունը կա: Սա մեզ վատ տեղ է տանում: Իսկ «ոչ» ասելով՝ լեգիտիմացնում են հանրաքվեն»:
Տաթև ՀԱՐՈՒԹՅՈՒՆՅԱՆ
