Քիչ առաջ Վերաքննիչ քրեական դատարանը դատավոր Ալեքսանդր Ազարյանի նախագահությամբ մերժեց «5-րդ ալիքի» սեփականատեր Արմեն Թավադյանի պաշտպանների՝ դատախազին ինքնաբացարկ հայտնելու միջնորդությունը։ Դռնփակ նիստի ավարտից հետո այս մասին լրագրողներին հայտնեց Արմեն Թավադյանի պաշտպան Արամ Օրբելյանը։ Նա ասաց, որ Թավադյանի կալանքը երկարաձգելու վերաբերյալ բողոքը կքննվի վաղը, ժամը 16:00-ին: Օրբելյանը տեղեկացրեց, որ Արմեն Թավադյանն այսօր ներկա է եղել դատական նիստին:
Արմեն Թավադյանը կալանավորվել է դեկտեմբերի 24-ին, նա մեղադրվում է մարտի 1-ի դեպքերից տուժած անձանց կաշառելու փորձի համար: Ըստ ՀՔԾ-ի, Թավադյանը ձերբակալվել էր Ռոբերտ Քոչարյանի ենթադրյալ աջակից Վարուժան Մկրտչյանին առնչվող քրեական գործի շրջանակներում, ՀՀ քրեական օրենսգրքի 340-րդ հոդվածի 4-րդ մասի 1-ին կետով նախատեսված հանցավոր արարք կատարելու կասկածանքով:
Թավադյանի գործով նախաքննությունն ավարտվել է, սակայն դեռեւս մեղադրական եզրակացություն չի կազմվել։
Հիշեցնենք նաեւ, որ Ալեքսանդր Ազարյանը ՀՀ 2-րդ նախագահ Ռոբերտ Քոչարյանի խափանման միջոց կալանքը փոխելու մասին, այլ կերպ ասած՝ազատ արձակելու մասին որոշում կայացրած դատավորն է:
Նելլի ԲԱԲԱՅԱՆ
