Բռնցքամարտի Հայաստանի ազգային հավաքականը Լոնդոնում կայանալիք օլիմպիական վարկանիշային մրցաշարի նախապատրաստության փուլի հայաստանյան վերջին մարզումը լրատվամիջոցների համար անցկացրեց բաց:
Մարզմանը մասնակցում էին այն բռնցքամարտիկները, որոնք վաղը գիշեր մեկնելու են Լոնդոն: Նրանց հետ չէին Հովհաննես Բաչկովը, որը մարզիչներից թույլտվություն ուներ, սակայն ընտրանուն կմիանա վաղը, եւ Արթուր Հովհաննիսյանը:
Հավաքականի գլխավոր մարզիչ Ռաֆայել Մեհրաբյանը լրագրողների հետ զրույցում մեկ անգամ եւս նշեց, որ նպատակը Տոկիոյի օլիմպիական խաղերի 3-ից 5 ուղեգիր նվաճելն է, ինչը նրա համոզմամբ իրատեսական է: «Մենք այս օրերին բռնցքամարտիկների փորձնական մենամարտեր անցկացրեցինք, ինչը ցույց տվեց, որ նրանք պատշաճ մարզավիճակում են եւ հոգեբանորեն պատրաստ են պայքարի:
Վարկանիշային մրցաշարին մասնակցելու են. 52 կգ՝ Կորյուն Սողոմոնյան, 57 կգ՝ Արթուր Բազեյան, 63 կգ՝ Հովհաննես Բաչկով, 69 կգ՝ Գուրգեն Մադոյան, 75 կգ՝ Արման Դարչինյան, 81 կգ՝ Գոռ Ներսեսյան, 91 կգ՝ Նարեկ Մանասյան, +91 կգ՝ Գուրգեն Հովհաննիսյան:
Կարդացեք նաև
Լոնդոնի վարկանիշային մրցաշարին մասնակցելու են նաեւ 51 կգ քաշային Անուշ Գրիգորյանը եւ 69 կգ քաշային Անի Հովսեփյանը:
Ռաֆայել Մեհրաբյանը տեղեկացրեց նաեւ, որ Նարեկ Մանասյանն արդեն լիովին ապաքինվել է վնասվածքից, հիմա լիարժեք մարզվում է եւ պայքարելու է օլիմպիական ուղեգրի համար:
Աշոտ ՀԱԿՈԲՅԱՆ
