Աբովյանի քաղաքապետ Վահագն Գեւորգյանին մեղադրանք է առաջադրվել ՀՀ քրեական օրենսգրքի 3152-րդ հոդվածով (պետական կամ համայնքային սեփականություն հանդիսացող հողամասերի ինքնակամ զավթումը, ինչպես նաև շենքերի և շինությունների ինքնակամ կառուցումը կասեցնելու, կանխարգելելու ուղղությամբ օրենքով սահմանված կարգով միջոցներ չձեռնարկելը): Նրա նկատմամբ որպես խափանման միջոց է ընտրվել ստորագրություն՝ չհեռանալու մասին:
Այսօր ԱԺ ճեպազրույցի ժամանակ այս առնչությամբ հարցին ի պատասխան՝ ԲՀԿ պատգամավոր Իվետա Տոնոյանն ասաց, որ ԲՀԿ-ն պաշտոնապես չի սատարել որեւէ մեկին Աբովյանի քաղաքապետի ընտրություններում, բայց ընկերական հարաբերություններ իրենցից շատերն ունեն Վահագն Գեւորգյանի հետ:
Նա խոսեց բնակարանաշինության կարեւորության մասին՝ ասելով, որ այս գործելաոճը մտորելու տեղիք է տալիս. «Պարոն Գեւորգյանը բավարար հիմնավորումներ ներկայացրել է ընթացակարգերի, անճշտությունների հետ կապված»:
Խոսելով հանրաքվեի քարոզարշավի մասին՝ Իվետա Տոնոյանն ասաց, որ հետեւում են քարոզարշավի ընթացքին, այն սահմանված կարգով է ընթանում. «Իհարկե, առանձին դեպքերում էքսցենտրիկ դրսեւորումների ենք ականատես լինում հասարակության տարբեր ներկայացուցիչների կողմից: Տեսնում ենք, որ այստեղ ավելի շատ հեղափոխության քարոզարշավ է գնում, բովանդակային մասով լուրջ շեշտադրումներ առկա չեն»:
Կարդացեք նաև
Հռիփսիմե ՋԵԲԵՋՅԱՆ
