«Ժողովրդավարական հայրենիք» կուսակցության նախագահ Պետրոս Մակեյանը Aravot.am-ի հետ զրույցում տեղեկացրեց, որ շարունակելու է մնալ կուսակցության անդամ:
Մամուլում տեղեկություններ էին տարածվել, որ նա կուսակցության նախագահությունից հրաժարվելու դիմում է ներկայացրել, և մարտի 8-ին պետք է նիստ հրավիրվեր, ու համագումարի համար ժամկետներ որոշվեին, որի ընթացքում էլ կքննարկվեր նոր նախագահի հարցը:
Մեզ հետ զրույցում Պետրոս Մակեյանն ասաց, որ կորոնավիրուսի պատճառով նիստը չի կայացել, համագումարի ժամկետների հետ կապված դեռ որոշում չունեն: Հարցին՝ իր որոշումն ուժի մե՞ջ է, Պետրոս Մակեյանը պատասխանեց. «Այո: Մարտ 1-ի նիստին քաղխորհրդի անդամները միաձայն մերժել են իմ առաջարկը: Որոշվել է համագումար հրավիրել, հարցը տեղափոխել համագումարի: Մնում է համագումարի ժամկետների հարցը լուծել: Եթե մենք այլ նիստ չենք հրավիրել, այլ որոշում չենք ընդունել, նախորդ նիստի բոլոր որոշումներն ուժի մեջ են»:
Մեր հստակեցմանը՝ իր՝ կուսակցության նախագահի պաշտոնից հրաժարվելու պատճառը միայն սահմանադրական հանրաքվեի հետ կապված տարաձայնությո՞ւնն է, Պետրոս Մակեյանը պատասխանեց. «Ոչ միայն հանրաքվեի հարցում, այլև ներքաղաքական ընդհանուր գնահատականների, այդ թվում նաև օրակարգային հանրաքվեի հետ կապված պատկերացումներում կան տարաձայնություններ: Անձամբ ես գտնում եմ, որ մեր պետությունն այն ճոխությունը չունի, որ կոնկրետ սահմանադրական դատարանի հարցով հանրաքվե անցկացնի, այլ պետք է ընդհանուր Սահմանադրության փոփոխություններ իրականացվեն, որում ներառվեն նաև այն հարցերը, որոնք այսօր փորձում են հանրաքվեով անցկացնել: Այսինքն՝ ընդհանուր Սահմանադրության փոփոխություն: Ավելի լավ է վեց ամիս հետաձգել, ընդհանրական փոփոխություն անել, քանի որ այդ Սահմանադրությունը, որ գործում է, ժողովրդի կողմից մերժված է: Եթե Սերժին մերժել են, չընդունված Սահմանադրությունն առավել ևս մերժված է»:
Կարդացեք նաև
Պետրոս Մակեյանն ասաց, որ կուսակցության երկու փոխնախագահներն էլ իր հետ համամիտ են, իսկ քաղաքական խորհրդի 11 անդամներն ունեն հակառակ կարծիքը: Պետրոս Մակեյանը նաև փոխանցեց, որ կուսակցության նախագահի հարցը կորոշվի առաջիկա համագումարի ընթացքում:
Տաթև ՀԱՐՈՒԹՅՈՒՆՅԱՆ
